Útrásarvíkingar Á - listans, ábyrgð þeirra.

Fyrrum bankaeigendur og útrásarvíkingar gengu hratt um gleðinnar dyr, þeim voru fengnar í hendur bankarnir og regluverk frelsis, sem þeir misnotuðu ótæpilega með skelfilegum afleiðingum fyrir íslenska þjóð. Þar brást alþingi Íslendinga hlutverki sínu.

Kerfi sveitarfélaga virkar allt öðru vísi en alþingi. Það sem meirihluti sveitarstjórnar ákveður, stendur. Eftirlitskerfi stjórnkerfisins er nánast ekkert. Því er of seint í rassinn gripið, þegar ástand er orðið sem það er á Álftanesi.

Á – listinn var kjörinn til ábyrgðar á Álftanesi vorið 2006. Mikil var bjartsýnin, markmiðin svakaleg og óhófið gengdarlaust strax frá fyrstu viku. Ársreikningar 2005 sýna ráðdeild. En síðan fer flest á hliðina hvað fjárhaginn varðar. Með því að skoða ársreikninga 2006, 2007 og nýbirtan ársreikning 2008, sést svo ekki verður um villst að bæjarsjóður hefur með ,,markvissum“ hætti verið settur á hliðina.

Skýringar fulltrúa Á – lista á síðasta fundi bæjarstjórnar á hrikalegri stöðu bæjarsjóðs um síðustu áramót eru marklausar, svo sem að efnahagshrunið hafi orsakað að allt fór á hliðina og háir vextir. Það er hluti vandans, en það kemur fleira til. Nú var það ljóst í árshlutauppgjöri janúar til september 2008 að hér stefndi í algert óefni. Svo sem ég hef sagt frá hér á síðunni, þá hafa áætlanir fulltrúa Á – lista gengið út á gengdarlaust óhóf og ráðdeild var eitthvað, sem þau hafa ekki skilið. Eins og ég hef bent á áður, þá sagði fyrrum forseti bæjarstjórnar á bæjarstjórnarfundi:

,,Allar áætlanir hafi staðist, nema tekjuáætlanirnar.“

Þetta er auðvitað ein af tilvitnunum aldarinnar að mínu mati. En drengurinn sá þurfti að hröklast úr bæjarstjórn eftir að hafa orðið uppvís að því að hafa villt á sér heimildir með fölskum tölvuskeytum, til þess að meiða saklaust fólk.

Það er vissulega staðreynd að óráð fulltrúa Á – listans hefur verið algerlega með ólíkindum allt þetta kjörtímabil. Staða bæjarsjóðs í lok árs 2007 gaf til kynna að hér stefndi í óefni. Fulltrúar D – lista hafa ítrekað bent á, allt frá sumri 2006, að þessir einkenniklegu áætlanir Á – listans gætu ekki gengið upp.

Vandinn var orðinn löngu óviðráðanlegur fyrir efnahagshrunið. En frá október sl. þegar kreppan skall á okkur af fullum þunga, þá var ljóst að dæmið var einfaldlega það sem venjulegt fyrirtæki myndi ekki ráða við. Sveitarfélag getur vissulega ekki orðið gjaldþrota, því að þá kæmi til kasta laskaðs ríkissjóðs að hlaupa undir bagga. Það er að mínu viti óeðlilegt að svo sé um hnútana búið að sveitarstjórnarmenn bera alls enga ábyrgð á sínum gerðum. Í lögum stendur einungis að sýna eigi ráðdeild með almannafé. Auðvitað eru kosningar á fjögurra ára fresti uppgjör, síðan geta menn bara gengið frá borði óáreittir.

Vonandi verður nýja sundlaugin vel nýtt, en þó að gjald sé rúmar tvö hundruð krónur í hvert skipti, þá er raunverulegur kostnaður pr. hvert einasta skipti notenda þó nokkrar þúsundir króna. Sundlaugin er svo sannarlega svolítið ,,2007" - það sér hver heilvita maður.

Annað dæmi er sér fyrirgreiðsla á fjárhagsvanda eiganda Bessans. En bæjarstjórn hefur nýverið með atkvæðum fulltrúa Á - lista samþykkt að skúrarnir og lóðin verði keypt dýru verði. Skyldi öðrum Álftnesingum í mögulegum fjárhagsvanda standa til boða slík fyrirgreiðsla sem eigandi Bessans fær? Auðvitað hafa samningar við eiganda Bessans fordæmisgildi. Aldeilis makalaust mál, sem ég mun gera sérstök skil síðar.

Á síðasta fundi bæjarstjórnar samþykktu fulltrúar Á – listans samninga við Búmenn um uppbyggingu fyrir þá sem eldri eru. Því miður verður húsnæðið ætlað að mestu fyrir bæjarskrifstofur fyrstu árin en ekki aðstöðu fyrir þá sem eldri eru, svo sem ætlað er við hönnun mannvirkisins. Framkvæmt verður fyrir lánsfé frá Íbúðalánasjóði á sérkjörum. Síðan verða öll herlegheitin leigð af bæjarsjóði. Þokkaleg viðbót við leigusamninga við Fasteign um sundlaugarmannvirkin. Ég tel víst að ekki sé ætlast til þess að fé Íbúðalánasjóðs sé misnotað með svo eindregnum hætti, sem raun ber vitni. Fulltrúar Á – lista samþykktu samningana, en fulltrúar D – lista sátu hjá. Ef ég hefði verið á fundinum, hefði ég greitt atkvæði á móti, vegna þess að ekki eru forsendur fyrir slíkum viðbótarskuldbindingum við okkar aðstæður í dag.

Með samningum við Búmenn (ef fyrirvarar í samningunum flækjast ekki fyrir upphafi framkvæmda) er ljóst að yfirspilað skipulag miðsvæðisins fær fyrstu framkvæmdina, með gatnagerð um svæðið og undirbúningi framkvæmda við húsgrunnana. Þá verður m.a. lagður nýr vegur sunnan v ið Suðurtún, vegur sem íbúar mótmæltu kröftuglega að kæmi á sínum tíma.

Já útrásarvíkingum Á – lista Álftnesinga er margt til lista lagt. Skuldir bæjarsjóðs eru yfir 2,5 milljarðar í árslok 2008, þegar halli á rekstri bæjarsjóðs 2008 er um 830 milljónir. Auk þess er leiguskuldbinding vegna íþróttahúss og sundlaugar um 2,5 milljarðar. Alls eru því skuldir Álftnesinga yfir 5 milljarðar eða yfir 2 milljónir á hvern einasta íbúa um síðustu áramót. Alls meira en fimmfaldar áætlaðar árstekjur 2009!

Fulltrúar Á – lista halda því fram nú að megin orsök sé efnahagshrunið. Samanburðartölur 2005, 2006, 2007 og 2008 sýna svo ekki verður um villst að það er einungis hluti skýringar.
Bera útrásarvíkingar Á – listans á Álftanesi einhverja ábyrgð? Verður gerð sérstök rannsókn á þeirra háttarlagi og meðferð á almannfé?

Hvernig endar þessi vitleysa í stjórn bæjarfélagsins, sem Álftnesingar upplifa?

Guðmundur