Fasteignagjöld hafa hækkað um 52%!

Það fór hrollur um marga Álftnesinga í vikunni, þegar fasteignagjaldaálagningin og fyrsti greiðsluseðilinn af átt komu inn um bréfalúguna. Að hugsa sér, við þurfum að hafa greiðsluseðla fasteignagjaldanna í höndunum lungað úr árinu og það engin smá upphæð, í mínu tilefelli kr. 29.500 á mánuði í átta mánuði – mars til október.
Fasteignagjöldin hafa hækkað um 51,84% á tveimur árum!

Dæmi: Einbýlishús, íbúð 145,1 m² og bílskúr 52,2 m²

Fasteignagjöldin og samanburður milli ára:




Að hugsa sér ósköpin og ekki síst miðað við aðstæður nú um stundir. Árið 2006 voru sex gjalddagar en strax árið 2007, þegar Á – listinn valdi leiðina var hækkunin svo hressileg að nam upphæð tveggja gjalddaga, enda var greiðslutímabilið lengt í átta mánuði.
Ég minnist þess hve illa fulltrúar Á – lista létu á síðasta kjörtímabili, þegar fasteignamat hækkaði mjög verulega og ljóst var að fasteignagjöldin myndu hækka sem því næmi. Álagningarhlutfall fasteignaskatts var lækkað þá og þar með dregið úr hækkun fasteignagjaldanna. En hjálpi mér hamingjan, nú er aldeilis tekið á því og gagnrýni er tilgangslaus, svo sem afgreiðsla tillögu fulltrúa D – lista ber með sér á síðasta fundi bæjarstjórnar.
Guðmundur

Skipulagsslys Á – listans.

Það blöskrar mörgum þessi hrikalega ásýnd – gula ferlíkið við sundlaugina - rennibrautin. Að þessi ósköp skuli vera orðið ,,kennileiti“ á Álftanesi og sést víða að. Er í raun það fyrsta, sem menn reka augun í, þegar komið er vestur yfir Presthól á leiðinni heim Álftanesveginn.
Þegar fulltrúar Á – listans hömuðust í því að eyðileggja skipulag miðsvæðisins veturinn 2005 – 2006 og þar með leggja drög að því sem nú er ætlað er að verði á því svæðinu, þá settu þau m.a. upp skilti við gatnamótin að Bessastöðum.
Á skiltinu stóð – Skipulagsslys.
Hjá Á – liðinu voru á þeim tíma ,,göfug markmið“ um lágreist mannvirki, sátt við íbúa, íbúalýðræði, minni skuldir o.s.frv.
Vorið 2006 voru sumir Álftnesingar plataðir illilega af Á – liðinu.
Gert var ráð fyrir því við samþykkt bæjarstjórnar á sínum tíma, að samráð yrði haft um umfang og kostnað nýbyggingar við íþróttamiðstöðina. Það var nú öðru nær, engin glóra var í vinnu við undirbúning þessa mannvirkis. Þar ríkti það sjónarmið fulltrúa Á – listans = að eyða sem allra mestu. Taka sem mest að láni.
T.d. vitleysan með öldulaugina, en nú hefur loks verið upplýst að hún sé einkum ætluð félögum í kajak klúbbnum Sviða! Þegar gagnrýndur var ætlaður kostnaður við svo umfangsmikið mannvirkið þá sögðu þau Á - liðarnar: ,,Við viljum vera flott á því.“ Sem sagt 250 til 300 milljónir skiptu ekki máli í öldulaugina, enda allt tekið að láni.
Auðvitað var sama hugsunin í bruðlinu með sundlaugarbygginguna eins og í peningaspillingunni í kring um allt verkið ,,Grænan miðbæ“ bæjarstjórans.
Það voru gerðar óraunhæfar áætlanir um tekjur bæjarsjóðs, sem aldrei komu. En það sem verra var, það var eytt á bæði borð, á grundvelli tekjuáætlana sem brugðust.
Óráðið byrjaði strax í júní 2006, sem fulltrúar D – lista hafa ítrekað varað við síðan.
Sem sagt ,,verum flott á því“ eyðum og eyðum – tökum sem mest að láni. Þau þurfa ekki að hafa áhyggjur af greiðslunum af lánunum Á - liðarnir– það munu þau gera sem munu skipa næstu bæjarstjórn og aðrir Álftnesingar munu finna fyrir! Þar munu Á - liðarnir hvergi koma nærri.
Í áætlunum Á – listanna er gert ráð fyrir miklum tekjum af nýju mannvirki við sundlaugina á árinu 2009 og 2010. Gert er ráð fyrir miklum straumi fólks af suðvesturhorni landsins. Fulltrúar D – lista við undirbúning (sem ekki var hlustað á) hafa ítrekað bent á að áætlanir um magnaðar tekjurnar eru byggðar á sandi.
Vesenið er nú sennilega aðeins flóknara, það bendir allt til þess að mannvirkið sé ekki reist í samræmi við gildandi deiliskipulag frá í mars 2008. Sé það rétt, þá verður fróðlegt að sjá hvernig snillingarnir, Á – liðarnir vinna úr þeirri stöðu.
Guðmundur

Biederman og brennuvargarnir.

Ég hitti á dögunum ágætan félaga, sem hefur eins og við öll velt fyrir sér þessum ósköpum, sem dunið hafa yfir okkur. Kreppu sem ,,toppar“ allar aðrar niðursveiflur samtímans og líklega mun lengra aftur í tímann.
Hann gerði samlíkingu með því ágæta leikhúsverki ,,Biederman og brennuvargarnir“ eftir Max Fritz, en leikritið fjallar um húseigandann Biederman og leigjendur, sem fluttu timbur og annað dót í bygginguna og kveiktu síðan í öllu heila klabbinu.
Sem sagt, Biederman gamli gerði jú alls ekki ráð fyrir að leigjendurnir myndu bera eld að innvolsinu sem þeir báru inn í bygginguna, sem því miður gerðist.
Má með þessu sjá samlíkingu með því sem gerst hefur á Íslandi, þar sem umgjörðin var kyrfilega misnotuð af brennuvörgum nútímans.
Ljóst má vera að skellur kreppunnar er mun svakalegri en hefði orðið, ef fámennur hópur hefði ekki misnotað þannig aðstöðu sína, á kostnað fjöldans.
Nú hlýtur það að vera meðal annars markmið Sjálfstæðismanna á Landsfundi í lok mars nk. að setja sér a.m.k. þrjú markmið:
a) Gera upp við fortíðina.
b) Gera vel grein fyrir stöðunni í nútíð.
c) Marka skýra stefnu til framtíðar.
Staða Sjálfstæðisflokksins utan ríkisstjórnar er einstök miðað við aðstæður. Vegna þess að nú er hægt að vinna einbeitt að því marki að flokkurinn komi tvíefldur til undirbúnings kjördegi til alþingis í lok apríl.
Sjálfstæðisflokkurinn þarf að leggja á borð sterk rök og skýr fyrir því að verða beittur valkostur við nýjar aðstæður.
Guðmundur

Miðskógar 8 og lygin.

,,Ofan í friðaða fjöruna" segir bæjarstjórinn og hinir bæjarfulltrúar Á - listans í sífellu í Garðapóstinum, Fréttablaðinu og í Morgunblaðinu. Bæjarstjórinn hefur í viðtali í hádegisfréttatíma RÚV sagt frá þessari friðuðu fjöru við Miðskóga 8.
Þessi fullyrðing er því miður hrein og klár lygi.
Fjaran með Skógtjörninni og önnur fjara á Álftanesi er ekki friðuð, nema fjaran við Hlið syðst á Álftanesi. Fjaran við Skógtjörn er hins vegar á náttúrumynjaskrá, sem er einskonar viljayfirlýsing. Friðun er auðvitað allt annað og alvarlegra mál, þar sem sveitarfélag, landeigandi og Náttúruráð sameinast um samning landnýtingu tiltekins svæðis til verndunar.
Hvað þessu fólki gengur til með greinum sínum í blöð nú undanfarið vegna Miðskóga 8 er mér algerlega hulið. Svo kyrfilega bæta þau gráu ofan á svart, með þessum ólíkindatexta í greinum sínum. Svona stjórnsýsla er Álftnesingum til skammar.
Sjá nánar grein hér á blogginu dags. 30. janúar sl. = ,,Mogginn í dag, síða 22.

Guðmundur

Hæsta mannvirkið á Álftanesi.

Nú er verið að reisa hæsta mannvirki á Álftanesi, rennibraut við sundlaugina. Rennibrautin mun gnæfa yfir nesið og yfir íþróttahúsið og nálæg íbúðarhús. Rennibrautin mun sjást víða að. Það er sérkennilegt að rifja upp hamaganginn, sem bæjarfulltrúar Á - listans stóðu fyrir á árinu 2005 og fram að kosningum vorið 2006. Þegar nefnd voru þá að sum húsin yrðu ca. 10 metra há á svæðinu, svimaði og sundlaði liðinu og leið afar illa yfir ,,stórkostlegri hæð sumra húsanna" á þá ætluðu deiliskipulagi. M.a. var gripið til þess ráðs af þessu fólki að setja upp skilti við afleggjarann að Bessastöðum. Á skiltinu stóð - SKIPULAGSSLYS.
Einu sinni var hart tekist á um sjálft íþróttahúsið, þ.e. hæð þess. Þá sagði mætur maður, sem bjó á nesinu að það yrði sjónmengun af þessu húsi ef það risi. Hvað hefði sá ágæti maður sagt nú?
Auðvitað var ekkert að marka sjónarspilið, sem fulltrúar Á - lista settu í gang hérna um árið. Hvað finnst Álftnesingum? Er hún ekki stórbrotin rennibrautin? Og er ekki líklegt að rennibrautarturninn muni vekja athygli á sundmiðstöðinni um allt höfuðborgarsvæðið og víðar og valda straumhvörfum í mætingu sundgesta á nesið? En bæjarstjóri gerir jú ráð fyrir því í fjárhagsáætlun ársins að örtröð verði í sundmiðstöðinni, allavega þetta árið.

Guðmundur

Búmenn á Álftanesi.

Á fundi bæjarstjórnar 29. janúar sl. dúkkaði upp án fyrirvara og án þess að getið væri í fundarboði tilkynning frá bæjarstjóra um að Búmenn hefðu upp á vasann 750 milljón króna lánsloforð Íbúðalánasjóðs vegna byggingar Búmanna á 10 íbúðum fyrir eldri íbúa og þjónustumiðstöð á miðsvæðinu. En þessa ,,þjónustumiðstöð“ ætla Búmenn að leigja bæjarfélaginu fyrir skrifstofur í einhver ár, en ekki til afnota fyrir eldri íbúa Álftaness. Ekki hef ég vitneskju um að Íbúðalánasjóður hafi áður gefið lánsloforð til slíkra hluta, séu þessar upplýsingar réttar yfirhöfuð. Á fundi bæjarráðs 22. janúar var ekki nefnt einu orði að þessara tíðinda væri að vænta.

Þessi vinnubrögð eru svo sem í takt við annað í stjórnsýslu Álftaness. Sýnist mönnum almennt að það séu að hefjast framkvæmdir á miðsvæði Álftaness skv. ólíkindaskipulagi svæðisins? Búið er að halda fjölmarga fundi vegna ,,hönnunar“ mannvirkis þessa, sem byggja á loðnu orðalagi viljayfirlýsingar gagnvart Búmönnum. Engir samningar liggja fyrir gagnvart Búmönnum um eitt eða neitt. Svo virðist sem menn hafi aðeins tapað sér í hamaganginum. Uppbygging þessa mannvirkis virðist að mestu leiti byggður á grunni samnings sem var gerður við Eir árið 2005 um uppbyggingu fyrir eldri íbúa. Fulltrúar Á – lista eyðilögðu þann samning.

Eir gerði ekki ráð fyrir fjármögnun frá Íbúðalánasjóði vegna framkvæmdanna, sem ætlað var að yrðu skv. samningnum frá 2005. Enda lánar Íbúðalánasjóður ekki til framkvæmda, skv. hugmyndum sem nú eru uppi á borðum gagnvart Búmönnum á miðsvæði Álftaness. Það ku vera vegna lagafyrirmæla. Hvað hins vegar veldur því að bæjarstjóri heldur því fram að lánsloforð liggi fyrir frá Íbúðalánasjóði til Búmanna nú, veit ég ekki. Engin staðfesting vegna ætlaðs lánsloforðs hefur verið sýnd bæjarfulltrúum. Eðlilega var okkur bæjarfulltrúum Sjálfstæðisfélagsins nokkuð brugðið við þessa tilkynningu bæjarstjóra, þar sem málið er nú ekki alveg svona einfalt, svo sem tilvitnuð bókun á fundinum ber með sér. Engir samningar liggja fyrir um eitt eða neitt gagnvart Búmönnum. Er þetta ekki pínulítið sérstakt?

Eftirfarandi er úr fundargerð bæjarstjórnar 29. janúar sl. við umræðu um fundargerð bæjarráðs frá 22. janúar. Sá liður heitir Miðsvæði – staða mála.
Tilkynning bæjarstjóra og bókun fulltrúa Sjálfstæðisfélagsins af þessu tilefni:

,,Bæjarstjóri upplýsti að stjórn Íbúðalánasjóðs hefði í síðustu viku samþykkt lánveitingar til Búmanna upp á 750 milljónir, til fyrsta áfanga framkvæmda á miðsvæði Álftaness, þ.e.a.s. til fyrstu 10 íbúða og þjónustumiðstöðvar. Áformað er að þessar framkvæmdir geti hafist í sumar og því þurfi að semja sem fyrst um vegaframkvæmdir.
Bæjarstjóri ræddi tillögu frá bæjarfulltrúum Á - lista sem kynnt var í bæjarráði fyrir áramót um heimild til hans að leita óhefðbundinna samninga um framkvæmdir á miðsvæðinu ef slíkt væri hagkvæmt fyrir sveitarfélagið.“

Bókun fulltrúa Sjálfstæðisfélagsins:
,,Ekki liggja fyrir samningar bæjarfélagsins við Búmenn um afnot og nýtingu húsnæðis, sem ætlað er að Búmenn byggi. Ekkert liggur fyrir um leiguverð til bæjarfélagsins og ætlaðra íbúa. Ekki liggur fyrirframkvæmdaáætlun eða rekstraráætlun fyrir mannvirkið. Hver verður fjárhagsleg skuldbinding bæjarsjóðs vegna verkefnisins m.a. vegna gatnagerðar, nú þegar ljóst er að bæjarsjóður er þegar alvarlega skuldsettur? Við óskum eftir efnislegum og fjárhagslegum samanburði við samning við Eir frá árinu 2005, sem fulltrúar Á – lista lögðu sig fram um að eyðileggja."

Guðmundur