Landsfundur Sjálfstæðisflokksins

Ég óskaði eftir og fékk birt á mbl.is í dag eftirfarandi klausu:

„Mér finnst algerlega með ólíkindum, ef rétt reynist, að á Landsfundi Sjálfstæðisflokksins nú um helgina verði ekki rætt um frammistöðu alþingismanna og forystu flokksins árin 2000 til 2008. Þá er um að ræða annan landsfund í röð, sem tekur ekki á þeim vandamálum sem hrjá flokkinn eftir kerfishrunið haustið 2008. Látið er hjá líða að því er virðist að gera upp fortíðina og aðkomu kjörinna fulltrúa flokksins á alþingi og forystu hans og andvaraleysi gagnvart þróun, stöðu þjóðarbúsins og velferð landsmanna.

Ljóst er að forysta flokksins og alþingismenn vissu um alvarlega þróun mála, a.m.k. allt frá árunum 2005 eða 2006, en svo virðist sem flotið hafi verið sofandi að feigðarósi. Aðvörunum sérfræðinga var ekki sinnt og eftirlitshlutverk alþingis drukknaði í hrunadansinum.

Meira að segja skipulögð glæpastarfsemi var látin óátalin og þreifst fyrir opnum tjöldum undir forystu veruleikafirtra eigenda bankanna, með fulltingi margra forhertra viðskiptaaðila bankanna. Fjármálakerfi landsins og mörg stórfyrirtæki sneri veruleikanum á haus og almenningur situr uppi með tjónið og landsmenn eru í átthagafjötrum. Hvernig gengur það upp að allt að 1600 manns mæti til Landsfundar nú undir slíkum formerkjum, ef ekki á að taka á vandamálinu?

Sjálfstæðisflokkurinn hefur alla burði til að "ná vopnum sínum á ný" - til þess að það geti orðið þurfa menn að skipuleggja keikir framtíðarferðalagið, án þess að hafa rotinn farangur í bakpokanum."

Með kveðju, Guðmundur G. Gunnarsson

Fyrsti fundur nýkjörinnar bæjarstjórnar Álftaness.

Fyrsti fundur nýrrar bæjarstjórnar var 21. júní. Þann 4. júní var undirrituð við Bjarnastaði yfirlýsing bæjarfulltrúa D, B og L - lista um samvinnu í nýrri bæjarstjórn.

Á fyrsta fundi bæjarstjórnar var kosið í bæjarráð, nefndir og önnur trúnaðarstörf.

Á heimasíðunni 225.is er gerð grein fyrir samstarfsyfirlýsingunni og trúnaðarmönnum L - listans í stjórnkerfi Álftaness.

Guðmundur

Sveitarstjórnarkosningarnar.

Það eru sterk skilaboð í úrslitum kosninganna á Álftanesi á laugardaginn var.

Ástæða er til að þakka þeim sem veittu L – listanum brautargengi.

Skilaboðin með kosningu fulltrúa Listans í bæjarstjórn eru afar skýr.

Árangur D – lista, L – lista og B – lista í kosningunum er mjög athyglisverður og skilaboð kjósenda um að á ný verði markviss vinnubrögð í bæjarstjórn Álftaness. Þar ræður öllu áhugi þessara framboða á hagsmunum og velferð Álftnesinga.

Skilaboðin eru einnig þau að reynsla flestra þeirra, sem nú hlutu kosningu í bæjarstjórn skipti öllu máli, þegar kemur að bráðaðkallandi úrlausnarefnum.

Ég hef skýrt hér á síðunni hvernig mín aðkoma að stofnun Listans bar að. Það hefur verið mér mikil ánægja að starfa með þessum stóra og góða hóp einstaklinga, sem stóð að framboð Listans. Áhuginn og eindrægnin smitaði svo sannarlega út frá sér.

L – listinn og áherslur okkar góða hóps eru komnar til að vera á Álftanesi.

Ítreka þakkir til allra sem komu að stofnun Listans og þakkir til þeirra, sem skipa Listann og framvindu frá 2. maí sl, en Listinn var stofnaður þann dag.

Bestu kveðjur, Guðmundur

Rannsóknarskýrslan, lögbrot, kúlulán og listarnir.

Rannsóknarskýrslan.
Það er með ólíkindum og með öllu óásættanlegt að Ríkisendurskoðun mun ekki leggja fram „rannsóknarskýrsluna um fjárhagslega skuldbindandi samþykktir bæjarstjórnar.“ Skýrsla þessi er gerð skv. samningi bæjarstjórnar og Eftirlitsnefndar með fjármálum sveitarfélaga dags. 17. desember 2009.

Það kom í ljós á fundi bæjarráðs 18. maí sl. að verulegar líkur voru á að Sigurði Magnússyni bæjarfulltrúa tækist að koma því til leiðar að rannsóknarskýrslan yrði ekki tilbúin fyrir kosningar. Ýmsum bellibrögðum beitti maðurinn, enda úttektin sú honum svo honum svo sannarlega í óhag.

Lögbrotin.
Ég sá ástæðu til þess að gera skýrslu dags. 6. apríl sl. og sendi hana m.a. Ríkisendurskoðun og einnig hefur saksóknari lögreglunnar skýrsluna til greiningar. Í þessari skýrslu geri ég grein fyrir málum, sem hafa verið til umfjöllunar í bæjarráði og bæjarstjórn á kjörtímabilinu. Ég bendi á að sérstaklega þurfi að rannsaka þátt Sigurðar Magnússonar fyrrverandi bæjarstjóra vegna afglapa í starfi, brota á sveitarstjórnarlögum, brota sem varða almenna stjórnsýslu og meðferð á almannafé.

Varðandi Eftirlitsnefnd með fjármálum sveitarfélaga, þá verði skoðað hvort lagaskyldu eftirlitsnefndarinnar hafi verið fullnægt. Auk fleiri atriða. Tel að skoða beri hvort lögum hafi verið framfylgt, af til þess bærum aðilum. Mín skoðun er skýr, sveitarstjórnarlög voru brotin og einnig önnur lög.

Tilvitnun í sveitarstjórnarlög:
- 55 gr. Verksvið.
- 61 gr. Fjárhagsáætlun.
- 62 gr. Breytingar á fjárhagsáætlun.
- 64 gr. Útgjöld úr sveitarsjóði og meðferð fjármuna og fasteigna.
- 65 gr. Miklar fjárfestingar og sala fasteigna.
- 74 gr. Eftirlitsnefnd.
- 75 gr. Fjárþröng.
- 76 gr. Svipting fjárforræða.
- 77 gr. Fjárhaldsstjórn.
- Lög og fyrirmæli sem geta átt við í þessu sambandi og almenn hegningarlög.

Af mörgum atriðum, sem ég nefni til sögunnar í skýrslunni í ótrúlegri og raunar sorglegri atburðarrás í bæjarstjórn Álftaness, þá tel ég að atburðir síðastliðið sumar hafi nú verið þeir tveir dropar, sem fylltu mælirinn.

Þannig var að smátt og smátt þrengdist svo fjárhagur bæjarsjóðs Álftaness, að nánast var um rekstur frá mánuði til mánaðar að ræða. Vanskil hlóðust upp og erfitt var að ná í peninga til greiðslu launa starfsfólksins. Í bæjarráði var á hverjum fundi á dagskrá fjárhaldsmál, en stóri vandinn var að bæjarstjóri þá, beitti okkur hin blekkingum. Sýndi okkur ranga og mjög fegraða stöðu bæjarsjóðs.

Bæjarstjórinn fékk þá flugu í höfuðið að við þessar aðstæður að væri sniðugt að bæta svolítið í skuldapakkann og hóf í byrjun júní að herja á K.B. banka um lántöku. Þá lá fyrir að ekki væri hægt að greiða starfsfólki laun í lok júní. 19. júní afgreiðir bankinn kr. 200 milljóna lán til bæjarstjórnar, án þess að fyrir liggi afgreiðsla bæjarstjórnar eða yfirhöfuð nein umræða farið fram um þessa lántöku. Lánið veitir bankinn á þeim grundvelli að fara eigi í framkvæmdir á miðsvæðinu, gatnagerð og fleira. Bankinn gleymir að biðja um að fá að sjá staðfestingu bæjarstjórnar um lántökuna.

Þá hafði engin ákvörðun verið tekin um framkvæmdir á miðsvæðinu. Athyglisvert er að á fundi bæjarráðs 28. júní var ekki minnst einu orði á að lánið þyrfti að taka, enda slík lántaka algerlega á skjön við þá fölsuðu pappíra, sem bæjarstjórinn hafði kynnt bæjarráði. Um er að ræða klárt hegningarlagabrot, skjalafals, umboðssvik og brot á lögum um almenna stjórnsýslu, sveitarstjórnarlögum um meðferð á almannafé. Og maðurinn gengur ekki bara laus, heldur bíður sig fram aftur við kosningar eins og ekkert sé!

Hitt atriðið eða dropinn, sem fyllti mælirinn var ótrúleg samningsflækja við Búmenn og Ris ehf, (sem heitir víst eitthvað allt annað í dag). Samningar upp á um kr. 1.200 milljónir um að byggja þjónustumiðstöð fyrir eldri íbúa, sem þó átti ekki að nýta sem slíkt, heldur nota fyrir skrifstofur bæjarfélagsins. Þetta kostulega einspil bæjarstjórans leiddi af sér að bæjarsjóður “eignaðist” rúmar kr. 300 milljónir í skuldabréfum, sem bæjarstjórinn ætlaði að nota andvirði af til að rúlla bæjarsjóði til vors 2010. Skuldabréfin voru víst andvirði kaupa þessara aðila á byggingarrétti á miðsvæðinu. K.B. banki er banki allra þessara aðila, sem komu að þessum dæmalausu og glannalegu samningum og það lá ljóst fyrir frá fyrsta degi að bankinn myndi aldrei kaupa þessi skuldabréf. Síðar kom auðvitað í ljós að enginn vildi kaupa bréfin. Með þessari samningsflækju, sem gerð er skil í fundargerð bæjarráðs 9. og 13. júlí sl. jukust skuldir bæjarsjóðs úr kr. 6.100 milljónum í kr. 7.300 milljónir. Þá er auðvitað inni í þeirri tölu “lánið” sem bæjarstjórinn tók og hafði ekki neina heimild fyrir.

Kúlulánið.
Það hefur farið fram svolítið skondin umræða um „kúlulán“ sem bæjarstjórn samþykkti að taka í mars 2005, alls kr. 300 milljónir. Reyndar er umræða nú að frumkvæði Sigurðar Magnússonar. Fimm ára lán með gjalddaga í mars 2010. Bæjarstjórinn fyrrverandi hefur áhuga á því að telja atburðarrásina einhvern vegin öðuvísi en hún var, til að slá ryki í augu fólks. Hann telur sem sagt að lán þetta hafi verið banabiti bæjarsjóðs! Ekki minntist hann nú á það sjónarmið um sumarið 2006, þegar Á –listi hafði verið kosinn til forystu í bæjarstjórn. Eða síðar, raunar ekki fyrr en nú allra síðustu vikur. Ég benti strax á um sumarið 2006, þegar ljóst var að fulltrúar Á – lista ætluðu að taka úr sambandi samþykkta fjárhagsáætlun, samþykkja innistæðulaus aukin útgjöld og hefja dauðadansinn um nýtt skipulag Miðbæjar á Álftanesi, að skoða yrði í víðu samhengi þessar nýju ákvarðanir, ekki síst hvaða áætlaðar tekjur bæjarsjóðs myndu þá falla niður.

Ekkert slíkt var gert og látið vaða á súðum í þokukenndri og listrænni sósíalískri draumsýn bæjarstjórans, sem illu heilli fór sínu fram átölulaust og með fulltingi sinna félaga í Á - lista. Auðvitað átti að skuldbreyta umræddu kúluláninu frá í mars 2005. Auðvitað átti að semja fjárhagsáætlun, sem tæki á auknum skuldavanda bæjarsjóðs. Það tekur í fyrir tekjulitlan bæjarsjóðs að samþykkja 33% lækkun leikskólagjalda og hefja heimgreiðslur til foreldras ungra barna k. 40 þúsund á mánuði. Svo sem gert var í ágúst 2006 og var með öllu ákvörðun án innistæðu. Ofan í allt þetta var samþykkt að taka að láni kr. 450 milljónir á haustdögum 2006!! Var þá ekki ástæða til að staldra aðeins við og skoða hvert í ósköpunum bæjarsjóður stefndi? Var ekki þá þegar ljóst að draumsýn mannsins gat ekki orðið að veruleika?
Listarnir.

Listarnir
Á – listi bauð fram vorið 2006. Það var eftir því tekið að oddviti listans Sigurður Magnússon Vintri grænum sagði listann vera óflokksbundinn, en að á listanum væru m.a. fulltrúar Samfylkingarinnar og Framsóknarflokksins. Getur það verið að með því að skipta Á – listanum frá 2006 í þrennt, að þá hlaupi Á, B og S - liðið í sitt hvora áttina, til að firra sig ábyrgð á óhæfuverkum kjörtímabilsins? Firra sig ábyrgð á því að hafa komið bæjarsjóði í þrot. Ætlar B og S – listi með sínum framboðum nú að telja Álftnesingum trú um að þau hafa hvergi komið nærri þessari sáru atburðarrás á kostnað Álftnesinga allra?

Á listræn draumsýn Sigurðar Magnússonar ekki lengur upp á pallborðið?

Hefur lögbrjóturinn Sigurður Magnússon nægt fylgi til að koma sjálfum sér í bæjarstjórn á ný? Skyldi Sigurður Magnússon vera búinn að borga Hafnfirðingnum Hjálmtý Heiðdal skuldina, sem þá var kr. 7 milljónir vegna kaupa hans á sandblástursfyrirtæki fjölskyldunnar í Hafnarfirði árið 2005. Ekki síðast þegar ég heyrði. Af hverju ekki að skýra frá því af hverju Sigurður var dæmdur í Héraðsdómi í október 2007 til greiðslu tveggja mílljóna, vegna brota á launasamningi við Hjálmtý? Ja, eins og Sigurður sagði á fundi bæjarstjórnar í október 2007 „ég dróst inn í þetta mál með óheppilegum hætti.“ Það eru orð að sönnu. Heitir þetta ekki þjófnaður á íslensku? Af hverju skýrir Sigurður ekki frá undarlegum starfslokum sínum hjá fyrirtækinu Ísvest í Kópavogi hér um árið? Hvernig varð sá viðskilnaður? Þetta eru nú einungis dæmi, fleira er hægt að tína til ef vill.

D – listi taldi allt þar til í síðustu viku bæði eðlilegt og sjálfsagt að bæjarsjóður Álftaness væri rekinn áfram og að Álftanes yrði áfram sjálfstætt bæjarfélag. Til þess þyrfti einungis ca. 3 milljarða úr ríkissjóði og nauðasamninga við lánadrottna. Ja heyr á endemið. Eitthvað gerðist svo hjá hópnum í síðustu viku, en þá var dreift stefnuskrá listans, sem segir að bæjarfélagið verði áfram sjálfstætt. En í leiðinni var dreift ljósriti, sem sagði að D – listi myndi hafa fumkvæði að sameiningu við annað bæjarfélag?!

Ég held að D – listi á Álftanesi sé að bíta úr nálinni með að hafa hafnað leið, sem ég lagði til í janúar 2009 að farin yrði. Að halda félagsfund og ræða málefni Sjálfstæðisflokksins og tengsl Sjálfstæðisfélagsins við flokkinn. Ég lagði til í bréfi 11. janúar 2009 að þessi mál yrðu rædd á opinn og heiðarlegan hátt á félagsfundi. Þá var sú hugsun mín skýr að ræða ætti hvernig forysta flokksins rann af „okkar leið“ – fór út af sporinu.

Ég hélt að þeir alþingismenn, sem kjörnir eru eigi að gæta okkar hagsmuna, landsmanna. Eitthvað fór verulega úrskeiðis í þeirri deild í einhverri gleðivímu. Skipulögð glæpastarfsemi þreifst í skjóli alþingis, svo sem fram hefur komið. Og meira að segja hluti liðsins, sem við kusum á alþingi í góðri trú, rann af leið. Þingmenn okkar og forysta Sjálfstæðisflokksins svaf á verðinum. Við erum að bíta úr nálinni með óhóflegt sukk-kerfi, sem fyrrverandi bæjarstjóri ákvað að taka þátt í. Málefni Sjálfstæðisflokksins og tengsl Sjálfstæðisfélagsins mátti ekki ræða að mati stjórnar félagsins. Þegar ég lagði til að boðaður væri félagsfundur og málin rædd opinsskátt, þá hófst atlagan að mér – svona mann er auðvitað ekki hægt að hafa í forystu D – lista.

Það vekur auðvitað eftirtekt að á lista Sjálfstæðsfélagsins nú eru 7 af fjórtán frambjóðendum úr stjórn félagsins og kjörnefnd fyrir prófkjörið.

Guðmundur G. Gunnarsson

Stofnun Listans. Af hverju ég?

Ég vil þakka af heilum hug það traust sem mér er sýnt með hvatningu um að taka þátt í að stofna nýtt framboð Listans.

Þessu til skýringar er að undanfarna mánuði hef ég fengið áskoranir um að gefa kost á mér til framboðs í kosningunum 29. maí nk. Einkum síðustu þrjár vikurnar fyrir lokafrest til að skila inn framboðsgögnum til kjörstjórnar. Mér hefur verið talin trú um að ég geti enn gert gagn, einkum með góðum hópi fólks, sem gaf kost á framboði í nafni Listann.

Til þess að láta reyna á hvort stofnun

Listans – óháðs framboðs áhugafólks um velferð Álftnesinga,

hefði hljómgrunn, þá tókum við fimm einstaklingar að okkur að kanna hug tiltekins hóps Álftnesinga til hugmyndarinnar.

Hugmyndin og samstaðan um stofnun Listans byggir á því að tekist hefur á undra skömmum tíma að leggja bæjarsjóðinn okkar í rúst. Andstaða í hópnum er þétt gegn því að álagsþvinganir í formi hærri opinberra gjalda og hærri gjalda vegna þjónustu vari lengur en góðu hófi gegnir. Því er eina vitið að ganga hratt fram og hefja vinnu við sameiningu Álftaness og annars bæjarfélags á höfuðborgarsvæðinu, strax að kosningum loknum.

Viðbrögðin við erindum okkar um stofnun Listans voru vægast sagt stórkostleg. Í upphafi var markmið að ef það fengjust tíu einstaklingar með víðtæka reynslu til að taka sæti á Listanum, þá yrði gengið alla leið og stofnað framboðið.

Vinna þessi hófst seinni partinn föstudaginn 30. apríl sl. og á sunnudeginum 2. maí var ljóst að af framboðinu yrði. Frá mánudeginum 3. maí til föstudagsins 7. maí fjölgaði stöðugt í hópnum, bæði þeirra sem buðust til að taka sæti á listanum og einnig þeirra, sem vildu gerast meðmælendur Listans. Var það í raun svo að þegar upp var staðið voru fleiri en 14 einstaklingar, sem vildu skipa sæti á Listanum. Afar ánægjulegir dagar fyrir okkur sem að undirbúningi stóðum. Dagar sem fylltu hópinn eldmóði til góðra verka við mjög erfiðar aðstæður á Álftanesi.

Við sem stöndum að framboði Listans erum mjög ánægð með móttökurnar og hvatninguna.

Það er skammur tími til stefnu, en alveg nægur. Málefnin sem fyrir liggja eru ekki í mörgum liðum. Við verðum að tryggja hagsæld Álftnesinga, það verður ekki gert nema með því að aflétta álagsþvingunum, sem bæjarstjórn varð illu heilli að samþykkja að setja á íbúa í vetur.

Hópurinn sem hefur samþykkt að taka sæti á Listanum er magnaður. Ég er ánægður að fá tækifæri til að vinna með svo eindregnum hópi áhugafólks um velferð Álftnesinga.

Þó svo að ég sé í Sjálfstæðisfélaginu og því í Sjálfstæðisflokknum, þá er Listinn með öllu óháður stjórnmálaflokkum, en einstaklingar á listanum og meðmælendur eru úr öllum áttum stjórnmála og flokksskírteini eða ekki flokksbinding, er algerlega utan við sjónarsvið Listans.

Auðvitað hef ég fengið þá spurningu í þessari atburðarrás hvort ég sé að gera uppreisn gagnvart D – listanum? Hvort ég væri í fýlu vegna niðurstöðu prófkjörsins? Hvort ég geti ekki hætt?
Auðvitað er ég ekki í fýlu vegna prófkjörsins, enda vita margir að ég sagði að þeim „leik“ loknum, að nú væri einfaldlega komið að leiðarlokum hjá mér. Mínu tímabili í bæjarstjórn Álftaness væri að ljúka.

Ég verð í Sjálfstæðisfélaginu áfram og læt ekki flæma mig úr því, sem ég og fleiri góðir einstaklingar stofnuðum vorið 1984.

Félagið hefur aðeins borið af leið um stund og ég er klár á því að það tekst einhvern tímann að rétta kúrsinn, þegar menn átta sig á því að æskilegt er að hafa stuðning fleiri íbúa en bara þeirra sem skráðir eru í D – deildina.

Ég hef velt upp áleitnum spurningum, sem stjórn Sjálfstæðisfélagsins hefur ekki treyst sér til að fjalla um, með eðlilegum hætti á félagsfundi eða öðrum fundum. Ég tel betra að halda til þar innan dyra, þó svo að ég hafi ekki áhuga á línunni, sem þar er gefinn þessa mánuðina. Það er nú bara þannig. Ég tel frekar eðlilegt að ég hafi færi á því síðar að spyrja spurninga, sem félagsmaður heldur en að yfirgefa þetta ágæta félag.

Þar er ég sérstaklega að vísa til bréfs, sem ég skrifaði á heimasíðu Sjálfstæðisfélagsins 11. janúar 2009 og er hér á blogginu einnig. Þetta bréf olli titringi því miður, enda fannst mér þá komið að því að Sjálfstæðisflokkurinn þyrfti að kíkja í gaupnir sér. Þetta bréf olli því að vissir aðilar í Valhöll fóru á taugum og fengu þáverandi forsætisráðherra þá formann flokksins og þáverandi menntamálaráðherra, þá varaformann flokksins til þess að hringja í mig. Bara svona „kammó“ spjall, sem við áttum saman 12. janúar. Einnig var hringt úr Valhöll í formann Sjálfstæðisfélagsins, sem boðaði stjórn félagsins á skyndifund 13. janúar um þetta „vandamál“ og var samþykkt ályktun í snatri á fundinum.

Við þetta rofnaði samband mitt að mestum hluta við hinn stærri trúnaðarhóp D. Athygli vakti hve stjórnin gekk bratt til verks vegna „vandamálsins“ og hefði ég nú talið miklu árangurs ríkara að elta ólar við önnur aðsteðjandi vandamál heima fyrir, en mínar skoðanir á vandamálum Sjálfstæðisflokksins.

Frelsi til tjáningar er mér afar dýrmætt, eins og fleirum. Ég hef ekki kynnst því fyrr í mínu félagi að tilraun sé gerð til þess að hefta skoðanaskipti, eða að tillögur til umræðna séu settar í svona bjánalegt samhengi. Það var sem sagt í janúar í fyrra að ég fékk slíkt beint í æð.

Það er mjög alvarlegt mál að félagar mínir í Sjálfstæðisfélaginu séu ekki tilbúin til þess að skoða hrunadansinn og þátt okkar flokks í ósvinnunni.

Í skjóli andvaraleysis eða sambandsleysis og þægingar alþingis og stofnana ríkisins, þreifst botnlaus spilling og yfirhylmingar skipulagðrar glæpastarfsemi. Þessi múgsefjun orsakaði m.a. þær aðstæður á Álftanesi að takmarkalaus fyrring réð ferðinni hér heima fyrir. Kjánalegar afleiðingar fyrir íbúana af völdum dæmalauss drambsháttar ofan í ástandið sem skapaðist af bankahruni fámennrar kjánaklíku sem þó náði að krækja í sér um líka mjög víða.

Ég er þeirrar skoðunar að alþingismenn þeir sem ég hef kosið í undanförnum tveimur alþingiskosningum hafi ekki lagt spilin á borðið í aðdraganda þeirra kosninga. Þeir vissu meira en þeir sögðu, enda lá ljóst fyrir í ráðuneytunum allt frá árinu 2005 að kerfið gæti sprungið yrði ekki brugðist við, sem ekki var gert. Allt átti að lagast af sjálfu sér.
Ég kaus skv. minni sannfæringu og tel að alþingi hafi ekki staðið sína vakt, svo sem ég hélt að þau væru kjörin til. Slíka gagnrýni er betra að koma á framfæri verandi innan búðar í Sjálfstæðisflokknum en utan, sem ég tel að verði endurreistur á góðum grunni, þegar menn hafa áttað sig á að sumir þingmanna okkar hafa verið og eru á villigötum. Slíka menn þarf að leiða frá trúnaðarstörfum fyrir flokkinn og fá þá einstaklinga til starfa, sem eru trúir sjálfstæðisstefnunni og því sem hún stendur fyrir.

Samvinna okkar fulltrúa Sjálfstæðisfélagsins í bæjarstjórn Álftaness hefur verið og er með miklum ágætum og engan skugga borið á. Það er mér heiður að vinna með fólki, sem hefur gott eitt til málanna að leggja fyrir Álftnesinga og vinnur af heilindum að settum markmiðum.

Á grunni heiðarlegra samskipta og magnaðrar samvinnu er Listinn stofnaður, af áhugahópi um velferð Álftnesinga.

Guðmundur

Sveitarstjórnarkosningar

Kosið verður 29. maí nk.
Stofnaður hefur verið Listinn
- óháð framboð áhugahóps um velferð Álftnesinga.

Þessi fréttatilkynning var send fjölmiðlum í gær í tilefni af stofnun listans.
Listinn mun fá eigin heimasíðu og síða á Facebook verður sett upp.
Kveðja, Guðmundur

8. maí 2010.
Sveitarstjórnarkosningar 29. maí 2010.
Stofnaður hefur verið listi óháðra á Álftanesi fyrir sveitarstjórnarkosningarnar 29. maí nk. Að listanum stendur áhugahópur íbúa um velferð Álftnesinga. Framboðið er óháð stjórnmálaflokkum. Meginmarkmið er að fjárhagslegum álagsþvingunum, sem Álftnesingar þurfa að bera ofan í ógnvekjandi stöðu heimilanna almennt í landinu af völdum hrunsins, verði aflétt strax á þessu ári. Það verði ekki gert nema með sameiningu við annað bæjarfélag á höfuðborgarsvæðinu, sbr. skýrslu bæjarstjórnar Álftaness dags. 27. janúar sl. Hefja þarf vinnu við það verkefni strax að kosningum loknum. Slíkar ráðstafanir þola enga bið.
Með kveðju, f.h. Listans, Guðmundur G. Gunnarsson

Listi óháðra á Álftanesi:

1. Guðmundur G. Gunnarsson verkefnastjóri
2. Valgerður Júlíusdóttir framkvæmdastjóri
3. Erlendur Sveinsson kvikmyndagerðarnemi
4. Anna Ólöf Thorlacius grunnskólakennari
5. Pétur Daníelsson framkvæmdastjóri
6. Sigríður Halldóra Pálsdóttir kennari
7. Haukur Herbertsson véltæknifræðingur
8. Guðný Hrund Þórðardóttir leikskólakennari
9. Guðbjörn Jensson verkfræðinemi
10. Guðbjartur I. Gunnarsson skipstjóri
11. Guðlaugur Einarsson sjómaður
12. Helga Kristjana Einardóttir stuðningsfulltrúi
13. Bogi Jónsson blikksmíðameistari
14. Guðrún Jóhannsdóttir ellilífeyrisþegi

Ábending um að kæra beri fyrrverandi bæjarstjóra

Þann 7. apríl sl. sendi ég til Ríkissaksóknara ábendingar til rannsóknar og ákvörðunar um ákæru á hendur fyrrverandi bæjarstjóra Sigurði Magnússyni. Ríkissaksóknari sendi þann 8. apríl plaggið til Lögreglustjórans á höfuðborgarsvæðinu til skoðunar.

Þar sem plaggið er 16 síður, með ýmsum tilvitnunum í fundargerðir bæjarráðs og bæjarstjórnar Álftaness, þá kemst innihaldið ekki fyrir á blogginu. Hér má á eftir sjá úrdrátt, sem skýrir megin mál.

Það er vissulega umhugsunarefni að enginn Álftnesinga sjái ástæðu til að skoða að kæra manninn fyrir algerlega ábyrgðarlausa hegðun. Álftnesingar eiga að skynja skyldu sína og benda viðkomandi yfirvöldum á það sem miður fer og gengur hreinlega ekki upp. Einkum er afgerandi skylda bæjarfulltrúa að sitja ekki hjá og láta afskiptalausa lögleysuna. Ég hef marg oft bent á staðreyndir hvað þetta varðar í fundargerðum bæjarráðs og bæjarstjórnar og ekki síður í blaðaskrifum og víðar.

Tilvitnanir í ábendingar til Ríkissaksóknara:

„Álftanesi 7. apríl 2010.

Ríkissaksóknari

Undirritaður óskar eftir rannsókn og ákvörðun um kæru. Í hlut á Sigurður Magnússon fyrrverandi bæjarstjóri á Álftanesi vegna afglapa í starfi, brot á sveitarstjórnarlögum, brota sem varða almenna stjórnsýslu og meðferð á almannafé. Lög um Eftirlitsnefnd með fjármálum sveitarfélaga eru nokkuð ljós, skoðað verði hvort lagaskyldu nefndarinnar hafi verið fullnægt.

Afrit sent:

Samgönguráðherra, Dómsmálaráðherra, Fjármálaráðherra, Eftirlitsnefnd með fjármálum sveitarfélaga og Ríkisendurskoðun.

Inngangur:

Undirritaður er bæjarfulltrúi og í bæjarráði Álftaness og kem þessari ábendingu á framfæri við Ríkissaksóknara vegna þess að mér er algerlega ofboðið hvert framferði Sigurðar Magnússonar í starfi bæjarstjóra Álftaness (SM) frá júní 2006 til október 2009 er með öllu látið átölulaust. Manns sem ber mest allra ábyrgð á klárum afglöpum, óvandaðri stjórnsýslu og klúrri meðferð á almannafé á Álftanesi á þessu kjörtímabili sveitarstjórnar. Maðurinn tekur að sér verkefni sem hann hefur enga burði til að takast á við, enga hæfni, reynslu eða þekkingu til starfsins, sem hann klúðraði með svo afgerandi hætti.

Einnig verði skoðað á hvern hátt Eftirlitsnefnd með fjármálum sveitarfélaga kom að málum, en lagafyrirmæli sbr. 74. grein Sveitarstjórnarlaga virðast nokkuð skýr. Vafi leikur á hvort eftirlitsskyldunni hafi verið sinnt sem skyldi.

Með vísan m.a. í eftirfarandi lagagreinar í Sveitarstjórnarlögum:

- 55 gr. Verksvið.
- 61 gr. Fjárhagsáætlun.
- 62 gr. Breytingar á fjárhagsáætlun.
- 64 gr. Útgjöld úr sveitarsjóði og meðferð fjármuna og fasteigna.
- 65 gr. Miklar fjárfestingar og sala fasteigna.
- 74 gr. Eftirlitsnefnd.
- 75 gr. Fjárþröng.
- 76 gr. Svipting fjárforræða.
- 77 gr. Fjárhaldsstjórn.
- Og aðrar þær lagagreinar og fyrirmæli sem geta átt við í þessu sambandi, svo sem almenn hegningarlög.

Fyrrverandi bæjarstjóri Sigurður Magnússon hefur orðið uppvís að vægast sagt afbrigðilegri hegðun í starfi bæjarstjóra, sýnt af sér fullkomið gáleysi og ábyrgðarleysi í störfum sínum fyrir Álftnesinga. Varðandi undirbúning mála, stjórnsýslu og meðferð á bæjarsjóði.

Fulltrúum í sveitarstjórnum er skv. lögum falin meðferð og umsýsla almannafjár og ber að sýna ráðdeild. Framkvæmdastjóri bæjarfélagsins er prókúruhafi og einnig hefur sá er gegndi þessu embætti frá júní 2006 til október 2009 verið aðalhugmynda-smiður áherslna fulltrúa Á – lista í bæjarstjórn Álftaness.

Þrátt fyrir að ýmsar ábendingar hafa legið fyrir, hefur ekkert verið aðhafst gagnvart manninum. Jafnvel þegar ljóst varð að Sigurður Magnússon (SM) myndi krefjast þess af sínum félögum, þegar úrslit sveitarstjórnarkosninga í maí 2006 lágu fyrir, að hann tæki sæti bæjarstjóra Álftaness.

Merki voru gefin Eftirlitsnefnd með fjármálum sveitarfélaga um að ekki væri allt með felldu, strax haustið 2006 og síðar. Útilokað er að starfsfólk ráðuneytanna, sem hafa farið með sveitarstjórnarmál á kjörtímabilinu, hafi ekki getað komið ábendingum um misferli til Eftirlitsnefndar. Það hljóta er vera einhver samskipti þar á milli.

Eftirlitsnefndin aðhafðist ekkert, fyrr en nýr meirihluti var myndaður í bæjarstjórn á haustdögum 2009. Þá var óskað eftir aðkomu hennar vegna stöðu bæjarsjóðs.

Einhvers staðar á þeirri óheillabraut til aukinna skulda bæjarsjóðs úr kr. 950 milljónum í árslok 2005 í kr. 7,3 milljarða hefðu átt að hringja aðvörunarbjöllur. Öll þessi ósköp á grundvelli illa grundaðra ákvarðana frá júní 2006 fram á mitt ár 2008. Úr því varð ekki við neitt ráðið.

Sveitarstjórnarlög varða m.a. hæfi sveitarstjórnarmanna, stjórnsýslu, ráðdeild með almannafé, aðkomu eftirlitsnefndar og fjárhaldsstjórnar. Lagafyrirmæli eru óljós á köflum. Þeir sem sömdu lagatextann hafa sjálfsagt ekki reiknað með að nokkurn tíma kæmi til Álftanes dæmisins.

Það er mat undirritaðs að lög hafi verið brotin, bæði varðandi stjórnsýslu og meðferð á almannafé.

Rannsókn Ríkisendurskoðunar á samþykktum fjárhagslegum skuldbindingum bæjarstjórnar Álftaness frá 1. janúar 2005, mun án efa varpa ljósi á samhengi hlutanna og málatilbúnaðinn í mörgum tilfellum. Rannsóknin er gerð á grundvelli samkomulags Eftirlitsnefndar og bæjarstjórnar frá 17. des. 2009.“

Fortíðin látin hjá liggja:

„Það er ótækt að SM komist upp með, gagnvart sínum félögum og ekki síst kjósendum á Álftanesi, að skýra ekki frá reynslu sinni, þegar lagt var af stað. Maðurinn er með öllu óhæfur til þess að fara með fé annarra. Dýrkeypt tilraun á kostnað Álftnesinga og væntanlega ríkissjóð. Upplýsingar um feril og framferði SM í fyrirtækjunum Samvirki, Rafafl, Stálafl, Íkarus, Bílaleigan Gullfoss, Bílaleigan Budget, Ísvest, Margfeldi ehf. og HK. Blástur ehf., gefa ekki tilefni til að slík reynslu- eða raunasaga leiði til trausts í meðferð á almannafé. Það liggur fyrir að hópar einstaklinga og opinberir aðilar töpuðu verulegum fjármunum á viðskiptum við SM í hluta fyrirtækjarununnar. Athyglisvert er að einungis einn þessara aðila sækir SM fyrir dómstólum vegna sviksemi og jafnvel þjófnaðar.“

Hver ber skarðan hlut frá borði?:

„Hagur Álftnesinga hefur því miður snúist til hins verra á undraskömmum tíma, en SM ber ekki skarðan hlut frá borði, hann fær greitt úr bæjarsjóði í um tíu mánuði laun og orlof, eftir brottrekstur hans úr starfi bæjarstjóra í okt. sl.

Í ljósi þessa alls er ástæða til að skoða á hvaða forsendum fyrrverandi bæjarstjóra eru greidd biðlaun í átta mánuði, frá starfslokum auk inneignar í orlofi. Slík biðlaun byggja á samþykkt bæjarstjórnar, með tveimur atkvæðum gegn atkvæði undirritaðs, en fjórir bæjarfulltrúar sátu hjá.

Ástæða er til að skoða að setja lögbann á greiðslur biðlauna fyrrverandi bæjarstjóra á meðan rannsókn Ríkisendurskoðunar fer fram á fjárreiðum Álftaness. Grundvöllur ákvörðunar um lögbann á greiðslur biðlauna til SM geta m.a. verið á grundvelli þessara ábendinga.

Ég tel víst að m.a. skv. upptalningu hér að framan, verði gefin út ákæra á hendur fyrrverandi bæjarstjóra vegna afglapa í starfi í andstöðu við lög.“

Guðmundur

Frétt á mbl.is í dag.

Gleðilega páska.

Ég rakst á þessa frétt áðan um ungverskan bæ.

"Ungverski bærinn Szigetvar hefur tvisvar komist í „heimsfréttirnar". Í fyrra sinnið árið 1566 þegar Suleiman soldán lét þar lífið í umsátri og síðara skipti var í byrjun þessa árs þegar bærinn lýsti sig gjaldþrota en bæjaryfirvöld stofnuðu til mikilla skulda vegna framkvæmda við baðhús og heilsulind.

Szigetvar stofnaði til nærri 2,6 milljarða króna skulda til að fjármagna framkvæmdir. Baðhúsið átti að laða að ferðamenn en íbúarnir búa sig nú undir erfiða tíma vegna þess.

„Við fórum af stað með miklar framkvæmdir án þess að gera okkur nægilega grein fyrir því hvort við, gætum fjármagnað þær. Skuldirnar byrjuðu síðan að hlaðast upp og í haust varð okkur ljóst að við vorum sokkin í skuldafen," sagði Gyula Rodek, aðstoðarbæjarstjóri.

Gerð hefur verið neyðaráætlun þar sem bærinn greiðir aðeins fyrir grundvallarþjónustu.

Talsmenn samtaka ungverskra sveitarfélaga segja, að ríkisstjórn landsins hafi á undanförnum árum flutt æ fleiri verkefni til sveitarfélaga en ekki hafi verið séð til þess að sveitarfélögin gætu fjármagnað þessi verkefni."

Furðu nákvæm samlíking við Álftanes, þ.e. að segja nútíma tilvitnunin.

Guðmundur

29. maí 2010

29. maí í vor verða sveitarstjórnarkosningar.

Ég tel að einhverjir Álftnesingar haldi að ekki verði kosið á Álftanesi í sveitarstjórnarkosningunum. Það tel ég að sé afar hæpið. Til þess að svo geti orðið, þyrfti ráðherra sveitarstjórnarmála að beita því valdi sínu að sett væru lög um sameiningu án aðkomu Álftnesinga.

Ljóst er flestum Álftnesingum að hrikalegt fjárhagslegt klúður í meðferð almannafjár á yfirstandandi kjörtímabili, hefur orsakað algert hrun bæjarsjóðs, gjaldþrots.

Augljóst er að í sveitarstjórnarkosningum í vor, erum við Álftnesingar í þeirri sérkennilegu stöðu, að kjósa bæjarstjórn til einungis skamms tíma. Mín sýn er að markmið verði að nýtt sameinað bæjarfélag verði til á þessu ári.

Það eru augljósir hagsmunir Álftnesinga að svo verði.

Mín sýn á framvindu næstu mánaða er þessi:

Þegar skoðanakönnun um vilja Álftnesinga liggur fyrir, eftir daginn í dag, verði gerð samantekt á kostum og göllum sameiningar við þau bæjarfélög, sem helst er áhugi fyrir að Álftnesingar sameinist.

Skv. samningi við eftirlitsnefnd með fjármálum sveitarfélaga dags. 17. desember 2009 er gert ráð fyrir því að samhliða fjárhagslegri endurskipulagningu, verði skoðaðir sameiningarkostir við annað (önnur)bæjarfélag.

Samhliða sveitarstjórnarkosningum 29. maí í vor verði aftur skoðanakönnun meðal íbúa, að undangenginni góðri kynningu á valkostum.

Þegar niðurstaða sveitarstjórnarkosninga og skoðunarkönnunar 29. maí í vor liggur fyrir, verði hafnar formlega viðræður við það bæjarfélag, sem Álftnesingar velja.

Meginverkefni nýrrar bæjarstjórnar á Álftanesi eftir kosningar í vor verður að vinna að sameiningu Álftaness við annað (eða eftir atvikum önnur bæjarfélög), með það að megin markmiði að álögur vegna hækkunar fasteignagjalda, álags á útsvar og hækkunar þjónustugjalda vari ekki lengur en út árið 2010.

Á haustdögum verði kosið um sameiningu við valið bæjarfélag.

Í lok nóvember eða í byrjun desember verði kosningar í sameinuðu bæjarfélagi.

1. janúar 2011 taki við ný bæjarstjórn í sameinuðu bæjarfélagi.

Niðurstaða:´

Álftnesingar beri ekki skarðan hlut frá borði, hvað gjöld, útsvar og þjónustugjöld varðar, lengur en út árið 2010.

Strax árið 2011 verði fasteignagjöld, útsvar og þjónustugjöld orðin hófleg á ný og vonandi lægri en voru árið 2009.

Guðmundur

Skoðanakönnun og Ice-safe.

Ice-safe.
Á morgun laugardaginn 6. mars 2010 verður þjóðaratkvæðagreiðsla um Ice-safe lögin, sem forseti synjaði staðfestingar.

Kosið verður í Álftanesskóla.

Það er ótrúlegt fyrirbrigði að í um 70 ára sögu lýðveldisins hefur enn ekki verið vilji til þess á alþingi að setja lög um 26. grein stjórnarskrárinnar.

Forysta ríkisstjórnarinnar gumaði að því í aðdraganda alþingiskosninga vorið 2009 að á Íslandi þyrfti að efla lýðræði, m.a. með þjóðaratkvæðagreiðslum. Þegar sú undarlega staða var upp komin að forseti nýtti sér umdeildar meiningar 26. greinar stjórnarskrárinnar og tók þar með valdið að alþingi sem þjóðin hefur kosið, þá voru góð ráð dýr. Þau ráð munu vissulega hafa ófyrirséðar afleiðingar fyrir stjórnsýslu Íslands. Ljóst varð strax að ákvörðun forseta vakti mikla gremju ráðherranna. Og meira en það, bæði forsætisráðherra og fjármálaráðherra tala nú niður þjóðaratkvæðagreiðsluna og telja hana vera hið mesta rugl.

Um hvað er í raun kosið á morgun? Skv. orðanna hljóðan er kosið um það hvort lögin taki gildi eða ekki. Í raunveruleikanum er það vissulega alls ekki þannig. Þjóðin mun greiða atkvæði um siðferði á morgun. Þjóðin mun greiða atkvæði með eða á móti ævintýralegum atgangi fámennrar klíku, sem óð áfram á eigin forsendum. Atkvæði verða greidd um það hvort þjóðin samþykki að greiða skuldir óreiðumanna.

Ég tel ljóst að alþingi fái einkunn og alvarlega áminningu á morgun. Alþingi fær ámæli fyrir ótrúlegan slóðaskap í langt í tvo áratugi. Í skjóli alþingis þreifst skipulögð glæpastarfsemi og að því er virðist fjárhættuspil með þjóðarhag.

Sífellt hafa borist fréttir af brjálæðislegum afskriftum til fyrirtækja og einstaklinga, sem í útrás skipulagðrar glæpastarfsemi voru.

Alvarlegir atburðir munu gerast á Íslandi ef ekki verður brugðist við vanda heimilanna, af völdum þessara glæpagengja, svo vit verði í. Íslensk heimili eru í hverjum mánuði að glíma við afleiðingar af gjörðum þessa liðs. Vegna hárra vaxta og hás gengis gjaldmiðla.

Að öllu þessu sögðu, er ljóst að þjóðin er að gefa óstjórninni og óstjórnlegri græðgi klíkunnar einkunn á morgun, með því að segja nei í þjóðaratkvæðagreiðslunni.

Skoðanakönnun.
Á morgun samhliða þjóðaratkvæðageiðslunni verður skoðanakönnun um vilja Álftnesinga til sameiningar við annað sveitarfélag. Þessi skoðanakönnun er gerð á grundvelli samkomulags við eftirlitsnefnd með fjármálum sveitarfélaga dags. 17. desember 2009.

Vissulega er um að ræða að hluta táknrænan gerning Álftnesinga, verið er að lýsa frati á hræðilega meðferð á almannafé, sem fyrrverandi bæjarstjóri virtist halda að væri hans eigin. Sá maður hefur reyndar aldrei getað meðhöndlað fé í annarra eigu á skynsamlegan hátt, sbr. hræðilegan ferilinn.

Fyrrverandi bæjarstjóri á Álftanesi ber þyngsta ábyrð á fáránlegri sóun á fé Álftnesinga á einungis þremur árum, með yfirgengilegri hugmyndafræðinni og ótrúlegri skrumskælingu staðreynda til að slá riki í augu íbúanna og ekki síður sinna meðspilara í bæjarstjórninni.

Álftanes var í raun gjaldþrota strax um áramótin 2007/2008, svo hart var keyrt. Þegar síðan hrunið varð í október 2008, var ljóst í hvað stefndi. Aðvaranir mínar um óráðssíuna allt frá hausti 2006, var sem hjóm eitt og látið lönd og leið og af furðumörgum talið vera nöldur. Nú segja margir, þú sagðir rétt frá?

Aðvaranir um óráðið bárust margar ráðuneyti sveitarstjórnarmála, sú fyrsta í september 2006, en slíkum aðvörunarmerkjum var hreinlega stungið undir stól.

Fjárhagsáætlun var gerð fyrir árið 2009, sem alls ekkert var farið eftir. Ljóst er nú að bæjarsjóður var rekinn frá mánuði til mánaðar allt árið 2009. Svona eins og skussi rekur lélegt bílaverkstæði, þurfti bæjarstjóri að hlaupa út um víðan völl um hver mánaðarmót til að bjarga aurum til að borga laun og annað bráðnauðsynlegt. Meira að segja tók fyrrverandi bæjarstjóri 200 milljóna kr. lán í júní 2009, sem hann hafði ekkert samþykki fyrir og því enga heimild til að taka. Lánið tók hann í KB. banka á grundvelli framkvæmda á miðsvæðinu. Hvernig það gat gerst að bankinn veitti lánið, án skoðunar á því hvort heimild væri til staðar, er mörgum hulið. Hann eyddi andvirði lánsins í laun og "nauðsynlegustu" reikningsgreiðslur. Á meðan hlóðust upp vanskil allt árið, til viðbótar við skelfilega stöðuna í árslok 2008. Vanskil sem m.a. hlóðust upp hjá Orkuveitunni, yfir 60 milljónir, sem ollu því að Orkuveitan rifti samningum við bæjarfélagið í desember sl.

Vakin er athygli á því að ekki færri en fimm fjármálastjórar komu að málum á skrifstofunni á Bjarnastöðum á einungis rúmum þremur árum, frá júní 2006. Fyrrverandi bæjarstjóri nýtti sér það ótrúlega ástand út í hörgul. Bæjarstjórinn fyrrverandi hrakti fólkið frá störfum sínum og réði að vild og því gat bæjarstjórinn í hráskinnaleik sínum, komið sínum ótrúlegu hugverkum í framkvæmd. Þ.e. þar til hann var einfaldlega stöðvaður og rekinn úr starfi í byrjun október sl. Það þurfti sterk bein til að snúa við blaðinu.

Meðal taugabilunaraðgerða þáverandi bæjarstjóra var að gera ótrúlega flókna samninga vorið 2009, svona í ætt við útrásina, m.a. við Búmenn og Ris. Samninga sem byggðu á algerlega fráleitum grunni. Fyrir þá samninga fékk fyrrverandi bæjarstjóri í hendur skuldabréf, sem hann trúði raunverulega að hann gæti selt og þannig bjargað sér og bæjarsjóði fyrir horn út árið 2009. Það lá meira að segja svo mikið á að framkvæmdir hófust á miðsvæðinu án staðfests framkvæmdaleyfis, sem er auðvitað enn eitt lögbrotið. Framkvæmdaleyfið var síðar staðfest.

Þegar ekkert fékkst fyrir skuldabréf þessara fyrirtækja, varð ljóst að spilaborg og blekkingarleikur fyrrverandi bæjarstjóra hrundi.

Álftnesingar bíta nú úr nálinni með þessa óleiki, sem mjög alvarlegir reyndust fjárhag bæjarsjóðs og ekki síður fjárhag íbúanna.

Bæjarstjórinn fyrrverandi gengur enn laus og fær greidd laun í átta mánuði auk inneignar orlofs. Ríflegur bónus fyrir hrunadansinn!

Engin leið er að sjá að ríkissjóður komi að endurreisn fjárhags Álftaness, án þess að því skilyrði verði fullnægt, að Álftanes sameinist öðru eða öðrum sveitarfélögum.

Sumum spekingunum á nesinu góða dettur í hug að á Álftanesi geti verið sjálfstætt sveitarfélag eftir hressilega fjárhagsaðkomu ríkissjóðs. Slíkar væntingar eru ryk í augu íbúa að hætti fyrrverandi bæjarstjóra. Því miður er búið að klúðra fjárhag Álftaness svo kyrfilega að einungis er val um að uppfylla samninginn við eftirlitsnefndina.

Því liggur fyrir að sjálfstætt sveitarfélag á Álftanesi mun brátt heyra sögunni til.

Sameining við annað eða önnur sveitarfélög þarf að vera um garð gengið fyrir árslok 2010, til þess að álögur á Álftnesinga verði á ný hóflegar.

Vek athygli á því að Á - listi undir forystu fyrrverandi bæjarstjóra lagði upp með það í furðulegri kosningabaráttunni vorið 2006 að á Álftanesi yrði sjálfstætt sveitarfélag. Að hugsa sér yfirgengilegt klúðrið og maðurinn gengur laus, svo sem hinir raftarnir sem ollu þjóðinni óbætanlegum skaða.

Því miður Álftnesingar, við höfum ekkert val. Búið er að fyrirgera möguleikunum á að á Álftanesi séu teknar ákvarðanir um framtíð bæjarfélagsins á okkar eigin forsendum.

Hvatning um mætingu á kjörstað.
Ég vona að mæting og þátttaka á morgun á kjörstað í Álftanesskóla verði góð, bæði í þjóðaratkvæðagreiðslunni og í skoðanakönnun um vilja Álftnesinga til sameiningar við annað bæjarfélag eða önnur bæjarfélög.

Gerum lýðum ljósa skoðun Álftnesinga á framferði með sjóði landsmanna og sjóð Álftnesinga, bæjarsjóðinn.

Guðmundur

Lýðskrum - skýring.

Ég hef ítrekað verið hvattur til að halda áfram skrifum mínum á bloggið, sú rödd þurfi að heyrast áfram.

Ég hef ítrekað verið spurður út í álit mitt á niðurstöðu prófkjörsins, síðan prófkjöri Sjálfstæðisfélagsins lauk laugardaginn 6. febrúar sl.

Ég hef verið hvattur til að tjá mig á bloggsíðunni og ég sé ástæðu til að gera það nú, frekar en að senda svör í tölvupósti, þó það sé auðvitað ágætt líka.

Þessar spurningar brenna í fólki:

a) Hvað ég eigi við með orðinu „lýðskrum“ í texta á blogginu frá 7. febrúar sl.?

b) Hvað sé mitt mat á því hvernig menn sem gefa kost á sér í prófkjörið, komast upp með að segja að ég hafi staðið í persónulegum deilum allt kjörtímabilið, það þurfi mannskap í bæjarstjórn sem geti unnið saman og að hægt sé að semja okkur frá stórum hluta skulda bæjarsjóðs og því þurfi ekki að koma til sameiningar við annað bæjarfélag? Þetta sjónarmið kom ítrekað fram í adraganda prófkjörsins hjá þeim sem náðu fyrsta og þriðja sæti.

Svör:

a) Orðið „lýðskrum“ notaði ég, vegna þess að ég er þeirrar skoðunar, að enginn eigi að gefa kost á sér til starfa fyrir íbúana í bæjarstjórn, sem ekki treystir sér til að gera það á grundvelli eigin verðleika. Sem sagt ekki á kostnað annarra, eða með upplognu rugli. Formaður kjörnefndar til uppstillingar á lista Sjálfstæðisfélagsins við sveitarstjórnarkosningarnar í maí nk. heldur því fram að „kosningabaráttan“ hafi verið með eðlilegum hætti. Ég tel að svo hafi ekki verið. Á Álftanesi hafa verið prófkjör áður til undirbúnings framboði D – lista. En þó aldrei með þeim aðdraganda og þeirri háttsemi, sem nú var. Með „lýðskrumi“ á ég við að slegið var fram ónákvæmum fullyrðingum og hreinlega staðlausum. Látið var að því liggja að á Álftanesi væri annar veruleiki, en í raun er.

b) Vissulega hef ég bent á að bestu svörin sé væntanlega að fá hjá þeim, sem í hlut áttu. Þetta eru í raun fjögur atriði, sem nefnd eru til sögunnar.

Persónulegar deilur: Því var haldið fram að allt kjörtímabilið hafi ég staðið í persónulegum deilum við þá félagana Sigurð Magnússon og Kristján Sveinbjörnsson. Ég tek að sjálfsögðu ekki í mál að svo hafi verið. Fulltrúar Á – lista höguðu sér með vítaverðum hætti, þegar bæjarsjóður átti í hlut. Ráðdeild var ekki fyrir að fara. Ég vakti athygli á því oftsinnis, að háttsemi með bæjarsjóðinn væri með óábyrgum hætti. Það gerði ég með skrifum í blöð og víðar og hóf þær aðvaranir strax haustið 2006. Með skrifum mínum vonaðist ég eftir stuðningi stjórnar Sjálfstæðisfélagsins og annarra íbúa, við að snúa þessari óheilla þróun við. Það hefur nefnilega blasað við allt of lengi að hér stefndi í að dramatískir hlutir gætu gerst, en sú varð því miður raunin. Þessar aðvaranir mínar til langs tíma og einnig aðvaranir okkar fulltrúa D – lista í bæjarstjórn, náðu því miður ekki eyrum Álftnesinga. Þessar aðvaranir voru sem vindur í eyrum ráðuneytis sveitarstjórnarmála, en í september 2006 skrifuðum við fulltrúar D – lista bréf til ráðuneytisins og vöktum athygli á einkennilegri stjórnsýslunni. Meira að segja eftirlit með fjármálum sveitarfélaga brást okkur Álftnesingum.

Menn verða að geta unnið saman:
Ég reikna með að þetta sé hluti framsetningarinnar á „persónulegum“ deilum, látið er að því liggja að ég geti alls ekki unnið með öðru fólki. Ég kann auðvitað ekki að meta svona aðdróttanir, þarna reyna menn að sleppa billega frá hlutunum. Auðvitað er sérkennilegt að svona málflutningur nái eyrum fólks, svona yfirleitt.

Hægt að semja okkur frá stórum hluta skuldanna:Þessir tveir sem héldu þessu fram og einnig að þeir væru mjög góðir í að leysa málið, vegna reynslu sinnar, vita í raun betur. Þeir koma ekkert að þessum málum, vegna þess einfaldlega að nú hefur tekið við fjárhaldsstjórn á vegum ráðuneytisins. Þannig eru fjármál bæjarfélagsins ekki lengur í höndum bæjarfulltrúa. Að halda svona vitleysu fram og ekki síður að ná kjöri út á svona leik, er auðvitað einkennilegt og ekki sæmandi þeim sem í hlut eiga. Eru menn þá að reikna með því að auknar álögurnar vari hér um ókomna tíð? Bæjarstjórn hefur þegar gert skýrslu, sem m.a. er lögð til grundvallar þeirri vinnu, sem nú er hafin og er í höndum fjárhaldsstjórnarinnar. Eðli máls samkvæmt er Álftnesingum ekki lengur treyst fyrir sínum fjármálum, eftir það yfirgengilega klúður með fjármál okkar eru komin í af völdum bæjarfulltrúa Á – listans.

Ekki sameining við annað bæjarfélag:Þessi staðhæfing um að ekki þurfi að koma til sameiningar, er algerlega með ólíkindum og enn þá furðulegra að ná árangri í prófkjöri út á þetta. Í samningi eftirlitsnefndar með fjármálum sveitarfélaga dags. 17. desember 2009, er m.a. getið um fjárhagslegar aðgerðir, sem byggja á því að gera bæjarsjóð rekstrarhæfan á ný og þegar því verki lýkur skal hefja vinnu við að leita sameiningarkosta. Þessi atriði hanga auðvitað saman, því að enginn trúir því í raun og veru að ríkissjóður leggi fé í aðgerðir til lausnar fjárhagsvandanum, án þess að því fylgi ströng skilyrði. Það skilyrði er sem sagt sameining við annað bæjarfélag eða bæjarfélög.

Að slá um sig með svona ólíkindalegum fullyrðingum, er auðvitað alveg ómögulegt. Álftnesingar eiga ekki skilið að borin séu á borð þeirra hrein og klár ósannindi. Við Álftnesingar höfum alveg fengið okkur fullsadda á staðlausum stöfum, sem því miður hafa ráðið för á Álftanesi þetta kjörtímabilið. Gífurlegt tjónið blasir við öllum.

Megin mál er að þær hremmingar, sem okkur er boðið upp á nú um stundir, vari alls ekki lengur en út þetta ár. Þá á ég við aukin þjónustugjöld, hærri fasteignagjöld og álag á útsvar. Sameining við annað bæjarfélag eða bæjarfélög verður að hafa gengið formlega í gegn á þessu ári, svo treysta megi því að hófleg gjaldtaka verði tekin upp á ný, strax 1. janúar 2011.

Það er mín von að sú flókna vinna, sem hafin er til lausnar fjárhagsvanda okkar Álftnesinga, skili árangri sem allra fyrst, svo mikilvægt sem það nú er.

„Lýðskrumið“ hentar afar illa, við þær aðstæður, sem nú eru á Álftanesi.
Á vísum stað stendur „betra er að veifa röngu tré, en engu.“
Álftnesingar eiga hreinlega mun betra skilið, nú um stundir.

Guðmundur

Þakkir til Guðrúnar

Ég þakka þér Guðrún skeytið hér á undan, viðbrögðum þínum við skeytinu mínu þar á undan.

Samband mitt og þitt hefur verið ákaflega traust og óskaplega þroskandi fyrir mig frá okkar fyrstu kynnum og alveg sérstaklega síðasta kjörtímabil og það sem nú er að nálgast enda.

Guðmundur

Aðsent skeyti, viðbrögð við niðurstöðu prófkjörs.

Ég er hjartanlega sammála Guðmundi.

Það átti að bíða með prófkjörið þar til frambjóðendur, ekki síst þeir sem komu nú nýir til leiks gerðu sér fulla grein fyrir hver staðan í raun er og hvað framundan er í málefnum sveitarfélagsins.

Guðmundi Gunnarssyni þakka ég heilshugar fyrir vel unnin störf í þágu okkar Álftnesinga og ekki síst fyrir alla sína hugsunarsemi og hlýju í garð okkar eldri borgara á Álftanesi. Ég mun svo sannarlega sakna hans úr bæjarstjórnarmálum okkar Álftnesinga. Enginn veit hvað átt hefur fyrr en misst hefur.

Sú gagnrýni sem Guðmundur hefur nánast einn þurft að standa fyrir á það hrikalega bruðl með fjármuni bæjarsjóð okkar Álftnesinga allra var ekki hans einkamál, heldur er nú að bitna á okkur öllum. Mér er gjörsamlega óskiljanlegt að enginn nema Guðmundur skuli hafa verið nógu glöggur til að átta sig á hvað var að gerast hér og hvernig þetta hlyti óhjákvæmilega að enda. Og enn síður get ég skilið að samherjar hans í stjórnmálum, félagar í Sjálfstæðisfélagi Álftaness skuli ekki hafa fylkt sér að baki hans í stað þess að væna hann um ófrið og persónulegar árásir á þá sem bruðluðu.

En það mun fyrr en varið renna upp ljós fyrir öllum Álftnesingum og líka þeim sem nú eru komnir nýir í efstu sætin og þykjast geta reddað öllu !

Það skal þó sérstaklega tekið fram að Kristinn Guðlaugsson þekki ég að góðu einu og veit fyrir víst að hann mun gera sitt besta.

Guðrún Jóhannsdóttir, formaður Félags eldri borgara Álftanesi.

Síðasta bloggfærslan

Nú liggur fyrir niðurstaða prófkjörsins frá í gær.

Stjórn Sjálfstæðisfélagsins var mikið í mun að flýta prófkjörinu, sem allra mest og varð ekki við óskum um að fyrir lægi hvert stefndi varðandi fjármál bæjarfélagsins.

Sl. fimmtudaginn fékk samgönguráðherra tillögu eftirlitsnefndar með fjármálum sveitarfélaga varðandi Álftanes. Ráðherrann á eftir að taka afstöðu til tillögunnar, sem varðar að Álftanesi verði sett fjárhaldsstjórn.

Stóra málið varðandi tillögu eftirlitsnefndarinnar er að auk þess að hér verði sett fjárhaldsstjórn, þá er mælt með að gerður verði samningur við bæjarstjórnina um framvindu og verkaskiptingu í vinnu framundan. Það að þessi samningur verði gerður er mikil viðurkenning á því verki, sem meirihluti bæjarstjórnar hefur unnið og skýrslu bæjarstjórnar um fjárhaldsaðgerðir.

Ég hefði kosið að þessar ráðstafanir væru öllum ljósar og hvað fylgdi í kjölfarið, þannig að íbúar og ekki síst þeir sem gáfu kost á sér í framboð í prófkjöri D - lista, hefðu skoðun á framhaldinu.

Ég hef lagt mig allan fram í störfum mínum í hreppsnefnd/bæjarstjórn fyrir Álftnesinga og yfirgef þann vettvang ánægður í hjarta, þegar kjörtímabilinu lýkur í vor.

Mig svíður auðvitað framkoman sem við gátum ekki komið okkur saman um að mótmæla kröftuglega sem einn maður, meðferðinni á almannafé þetta kjörtímabilið. Staða bæjarsjóðs er ömurlegt vitni um tilburði á grundvelli hugarburðar eins manns, sem virtist spila sóló með bæjarsjóðinn og komst upp með það.

Ég þakka öllu því góða fólki sem ég hef unnið með í sveitarstjórninni og auðvitað öllum þeim, sem hafa stutt mig.

Margrét Jónsdóttir bæjarfulltrúi sýndi mikinn kjark og styrk, þegar henni ofbauð staðan síðastliðið sumar og hafði frumkvæði að myndun nýs meirihluta bæjarstjórnar. Við fulltrúar D - lista og Margrét höfum unnið þétt saman og af miklum heilindum, sem einn maður. Við munum vinna saman til loka kjörtímabilsins, af sama krafti og eldmóði.

Árangur af vinnu okkar við vægast sagt mjög erfiðar aðstæður, er mikill og mun vonandi skila okkur á rétta braut á næstu vikum. Þar gildir að hagsmunir Álftnesinga eru í forgrunni og megin markmið að auka álögur á íbúa vari í sem skemmstan tíma.

Sérstakar þakkir færi ég Siggu Rósu og Kristni. Vinnuálagið á okkur bæjarfulltrúum í meirihluta bæjarstjórnar hefur verið með ólíkindum frá því í júlí sl. og einkum tímabilið frá október til þessa dags.

Ég þakka sérstaklega fyrir stuðninginn í prófkjörinu í gær.

Ég óska þeim velfarnaðar sem taka nú við forystunni fyrir D - listann.

Mér hugnast þó ekki lýðskrumið og moðsuðan, sem Álftnesingum var boðið upp á í aðdaganda prófkjörsins og vona auðvitað að slíkir tilburðir ráði ekki för það stutta tímabil, sem kosið verður til í maí í vor. Því miður heyrir Sveitarfélagið Álftanes brátt sögunni til.

Ég er stoltur af störfum mínum fyrir Álftnesinga.

Guðmundur

Prófkjör D - lista á morgun, laugardag.

Óska eftir stuðningi Álftnesinga í 1. sæti í prófkjöri Sjálfstæðisfélagsins á Álftanesi á morgun laugardag.

Það sem er mest um vert núna er að vinna á sem bestan hátt úr hrikalegri fjárhagsstöðunni.

"Verjum sjálfstætt samfélag á Álftanesi við erfiðar aðstæður"

Því fer fjarri að ég hafi gert mér í hugarlund á sínum tíma, þegar ég gaf kost á mér til starfa fyrir samfélagið okkar í hreppsnefnd og síðan bæjarstjórn, að hægt væri að bjóða upp á slíkar trakteringar, sem okkur íbúunum hefur verið boðið upp á síðustu misserin.
Að hér væri hægt að setja heilt bæjarfélag á vonarvöl á svo skömmum tíma, sem raun ber vitni, er með miklum ólíkindum.

Viðvörunarorð mín og minna félaga voru sem vindur í eyrum og ekkert með þau gert.

Staðreyndirnar hafa blasað við lengi, en það var ekki fyrr en sl. haust að hægt var að taka á vandanum með raunsæjum hætti, eftir að meirihluti Á – lista skiptinst í þrennt og nýr meirihluti bæjarstjórnar var myndaður 27. september.

Með endurskoðuðu uppgjöri janúar til ágúst 2009 lá vandinn á borðinu. Rannsóknarskýrsla eftirlitsnefndar með fjármálum sveitarfélaga dags. 8. desember sl. staðfesti að vandinn væri mikill og á landsvísu algerlega einstakur og án fordæma.

Gert var samkomulag við eftirlitsnefndina dags. 17. desember sl. um tilteknar aðgerðir, bæði til tekjuauka og kostnaðarlækkunar.

Í skýrslu bæjarstjórnar um fjárhaldslegar aðgerðir, sem samþykkt var á 8 klukkutíma bæjarstjórnarfundi 26. janúar sl. er samantekt á vandanum, sem við er að glíma og einnig tillögur til lausnar. Tillögur bæjarstjórnar um aðgerðir til þess að rétta af bágan fjárhaginn voru afhentar eftirlitsnefndinni 27. janúar sl.

Skýrsla bæjarstjórnar tekur á staðreyndum með markvissum hætti, þar er ekki byggt á vonarpeningum eða óraunverulegum rekstrarkostnaðartölum eða tekjum sem ekki eru í hendi.

Hægt er að skoða skýrslu bæjarstjórnar á heimasíðunni alftanes.is.

Því miður er ljóst að ríkissjóður þarf að koma að málum, er varðar fé til lausnar fjárhagsvandanum, svo sem fram kemur í skýrslu bæjarstjórnar.

Þá kemur helst til greina að ríkissjóður kaupi eignir bæjarfélagsins, svo sem byggingarland eða hlutafé bæjarsjóðs í Fasteign, sem á íþróttamannvirkin.

Ljóst er að samningar frá í sumar við Búmenn og Ris ehf. voru byggðir á sandi og tóku alls ekkert mið af fjárhagsstöðunni. Vonandi finnst að þeim samningum annar aðili eða aðrir til rekstrar en Álftanes og að verkefnin verði endurskoðuð og jafnvel endurhönnuð. Megin mál er að bæjarsjóður Álftanes verði ekki grundvöllur uppbyggingarinnar, heldur verði verkefninu fundinn raunhæfur farvegur án meiriháttar skuldbindinga af hálfu bæjarsjóðs.

Eftirlitsnefnd með fjármálum sveitarfélaga skilaði í gær tillögu til ráðherra sveitarstjórnarmála. Tillagan er að ráðherra skipi Álftanesi fjárhaldsstjórn skv. lögum.

Ráðherrann á eftir að taka afstöðu til tillögunnar, en mun væntanlega gera það í dag.
Með afgreiðslu tillögunnar mun ráðherra eyða óvissu og þá verður hægt að ganga hreint til verks á ljósum forsendum. Við verðum að líta á tillögu eftirlitsnefndar til ráðherra sem tækifæri til góðra og skilvirkra verka.

Við verðum að taka þátt í þeirri vinnu, sem framundan er á þessum forsendum, með opnum huga og leggja okkur fram um að sú vinna skili skjótum árangri. Þar sem markmið m.a. verður að vera að aukaálögur á Álftnesinga vari ekki lengur en út árið 2010.

Margir samverkandi þættir verða að spila saman, til þess að heildarlausn fáist, sem að mínu viti snúast um að heildarhagsmunir Álftnesinga verði í forgrunni í allri þeirri vinnu sem framundan er.

Sameining Álftaness við annað eða önnur bæjarfélög er meðal þessara samverkandi þátta.

Það er með öllu glórulaust líðskrum að halda því fram að á Álftanesi sé hægt að ætlast til að fé komi úr ríkissjóði, til lausnar fjárhagsvandanum sem við svo sannarlega komum okkur í og jafnframt að gera síðan ráð fyrir að Álftanes verði sjálfstætt sveitarfélag eftir fjárhaldsaðgerðir með aðkomu ríkissjóðs. Þá verði bara allt í góðu lagi hér á nesinu. Þessu hefur verið haldið fram í rökleysu líðskrums undanfarna daga, því miður. Slík framsetning er algerlega glórulaus.

Ekki er hægt að sýna fram á að hér verði rekið sjálfstætt sveitarfélag, svo hart hefur verið keyrt í belgingi fjárhags þessa litla og fjárhagslega viðkvæma bæjarfélags. Nú verður ekki undan því vikist að skoða m.a. sameiningarkosti, með heildarhagsmuni íbúa að leiðarljósi. Enda er sá þáttur vinnunnar skv. samkomulagi við eftirlitsnefndina frá 17. desember sl.

Ég tel að mín reynsla og þekking á málefnum Álftaness muni nýtast vel við þá vinnu sem framundan er. Ég geri ekki ráð fyrir að í maí í vor verði kosið til heils kjörtímabils, heldur þurfi ný bæjarstjórn að axla ábyrgð á ævintýramennsku liðins kjörtímabils.

Guðmundur

Tillaga um skipun fjárhaldsstjórnar

Í dag hefur eftirlitsnefnd með fjármálum sveitarfélaga tilkynnt ráðherra sveitarstjórnarmála um tillögu sína varðandi lausn á fjárhagsvanda Álftaness.

Tillagan til ráðherra er að skipuð verði fjárhaldsstjórn með vísan í 76. grein sveitarstjórnarlaga. Fjárhaldsstjórn leiti allra tiltækra leiða til lausnar vandanum. Auk þess er gerð tillaga um að gerður verði samningur um samskipti og verkaskiptingu fjárhaldsstjórnar og sveitarstjórnar um fjárhaldslegar aðgerðir á skipunartíma fjárhaldsstjórnarinnar.

Það að gerð er tillaga um samning um samskipti og verkaskiptingu fjárhaldsstjórnar og sveitarstjórnar er verulega stórt og mikilvægt skref fyrir okkur Álftnesinga. Slíkt ráðslag er viðurkenning á starfi núverandi meirihluta og skýrslu um fjárhaldsaðgerðir, sem samin var og samþykkt í bæjarstjórn 26. febrúar sl.

Eftirlitsnefndin bendir ráðherra á í þessu sambandi að starfsmenn sveitarfélagsins og sveitarstjórn hafi unnið gott verk við greiningu vandans og áætlanagerð, sem ætti að nýtast í framhaldsvinnunni.

Ráðherra þarf nú að taka afstöðu til tillögu eftirlitsnefndarinnar. Gangi þetta eftir, þá er ljóst að farvegur verkefnisins er inn rammaður.

Ég lít svo á að meiri líkur en minni séu á að ráðherra taki af skarið og skipi fjárhaldsstjórn.

Verði þetta niðurstaðan, þá verðum við að líta á það sem tækifæri til jákvæðrar fram þróunar. Þar með yrði ljóst að ríkið tekur af skarið og hyggst koma að málum með ábyrgum hætti og því ber að fagna. Í skýrslu bæjarstjórnar, sem lögð er til grundvallar er tæpt á mörgum atriðum, sem nýta má við úrlausn vandans.

Megin mál er að nú verði snör handtök og allri óvissu eytt á allra næstu mánuðum um hvernig mál verða leyst og hvert Álftnesingar munu stefna.

Viss kaflaskil verða með ákvörðun ráðherra, vonandi getum við horft brött fram á veginn. Þar ræður velferð og hagsmunir Álftnesinga för, þegar bæjarfulltrúar takast á við lokastefnu þessa viðamikla verkefnis.

Guðmundur

Þingmaður fer með fleipur

Í fréttum sjónvarps RÚV kl. 22 í gærkvöldi var viðtal við þingmanninn Magnús Orra Schram.

Þar var fjallað um fjárhagsstöðu Álftaness og viðskilnað Á - lista á bæjarsjóðnum, sem nú er til skoðunar hjá eftirlitsnefnd með fjármálum sveitarfélaga í Samgönguráðuneytinu.

Fréttamaður gerði þar nokkra grein fyrir stöðunni á Álftanesi, að hún væri slæm og að vont væri ef fólksflótti brysti á frá Álftanesi. Haft var viðtal við þingmanninn í fréttunum. En hann er í samgöngunefnd alþingis, sem fundaði í gærmorgun um fjárhagsvandræði Álftaness.

Fréttamaðurinn sagði að miklar deilur hefðu verið á Álftanesi og spurði m.a. þingmanninn "hvort til greina kæmi að skipa nýja sveitarstjórn." Svar þingmannsins var "já, það kemur til greina." Og síðan skýrði hann málið þannig að skipun fjárhaldsstjórn væri inni í myndinni, sem er úrræði skv. lögum. En lög gera reyndar ekki ráð fyrir að sveitarstjórnin víki þar með!

Hann hefur vissulega ekki lagst í miklar rannsóknir þingmaðurinn áður en hann fékk hvöt til að tjá sig, þrátt fyrir skýringar í samgöngunefnd í gær morgun og að allar upplýsingar lægju á hans borði og svo er nú ekki flókin lesning lögin um viðbrögð við þessar aðstæður.

Til að skýra aðeins tilurð þessa fundar í samgöngunefnd alþingis í gærmorgun, þá átti Sigurður Magnússon fyrrum bæjarstjóri á Álftanesi frumkvæði að honum og fékk hann Björn (Vinstri grænum) formann nefndarinnar til þess að boða fundinn. En vissulega var tilgangur Sigurðar að halda fram sínu sjónarmiði um að á Álftanesi væru vissulega engin vandamál.

Ekki var meining Sigurðar að Kristján Sveinbjörnsson bæjarfulltrúi mætti á fund nefndarinnar með honum, en það gerðist einmitt og það kom Sigurði í opna skjöldu. Þeir fyrrum félagar eru ekki aldeilis sammála um framsetningu Sigurðar á vandanum þessa dagana.

Auk þeirra fyrrum félaga mættu fulltrúa bæjarstjórnar Álftaness og eftirlitsnefndin á fundinn. Ekki þó saman, heldur sitt í hvoru lagi.

Guðmundur

Fundur Sjálfstæðisfélagsins vegna prófkjör 6.febrúar

Þessa ræðu flutti ég á fundi Sjálfstæðisfélagsins í gærkvöldi, þar sem frambjóðendur í prófkjörinu á laugardaginn kemur kynntu sig og sín mál. Fundurinn var vel sóttur og áhyggjur fundargesta eindregin, vegna stöðu bæjarsjóðs og aðgerða þess vegna.

Á Álftanesi eru nú fordæmislausar aðstæður.

Það eru 131 ár síðan gamla Álftaneshreppi var skipt upp, sem leiddi til þess að úr urðu þrjú sveitarfélög Bessastaðahreppur, Garðabær og Hafnarfjörður.

Bessastaðahreppur og frá 17. júní 2004 Sveitarfélagið Álftanes hefur lengstum verið vel rekið og lögð á það áhersla að útgjöld væru í samræmi við tekjur. Hér hefur lengst af verið hófleg gjaldtaka á íbúa, varðandi þjónustugjöld, útsvar og fasteignagjöld. Umfram allt hefur þess verið gætt að skuldir bæjarsjóðs færu ekki úr hófi fram. Enda hafa skuldir verið 30 – 40% af ársveltu nema árið 2005, þegar skuldirnar nálguðust samsvörun við ársveltu, eða um 950 milljónir.

Þegar haft er í huga að skuldir um síðustu áramót eru áætlaðar í námunda við 7 milljarða, eða rúmlega 5 x ársveltu, þá er ljóst í hverju menn hafa staðið þetta kjörtímabilið.

Og Á – listinn gerði út á sjálfstætt bæjarfélag.

Það þarf ekki að hafa mörg orð um viðsnúninginn, sem varð við kosningarnar 2006. Á – listi beitti fortakslausum yfirgangi, hér skildi öllu snúið við, sem fyrri bæjarstjórn hafði á prjónunum án minnstu tilrauna til málamiðlana eða tilrauna til sátta um stærri málefni.

Meðferð á almannafé þetta kjörtímabil er algerlega með ólíkindum.

Ég tel á engan hallað, þegar ég segi að ég hef haft um það forystu að vekja athygli á hættulegri þróun fjárhags bæjarsjóðs, alveg frá hausti 2006, en þá var ljóst að fara átti inn á algerlega nýjar brautir, án fyrirhyggju eða skoðun á afleiðingum innistæðulausra ákvarðana.

Í stuttu máli hef ég vakið athygli á erfiðri þróun fjárhags með bókunum í bæjarráði og bæjarstjórn, blaðaskrifum, skrifum á heimasíðu Sjálfstæðisfélagsins og á bloggsíðuna.

Þessar aðvaranir mínar, svo og tilskrif okkar bæjarfulltrúa Sjálfstæðisfélagsins til ráðuneytis sveitarstjórnarmála, ollu frekar fábrotnum viðbrögðum. Jafnvel var um tíma talið að einungis væri um stóryrði að ræða af minni og okkar hálfu og ofmat á stöðunni. Þarna var ekki um að ræða spádómsgáfu af neinu tagi, við vorum einfaldlega að glíma við áður óþekkta línu eyðslu og yfirgangs og þurftum að vinna úr þeirri stöðu eins og samviska okkar bauð. Staða bæjarsjóðs var síst máluð of dökkum litum af hálfu okkar bæjarfulltrúa D – lista.

Tillögur og aðvaranir okkar fulltrúa D – lista, einkum í bæjarráði og í bæjarstjórn, voru þrautalending, við þær aðstæður að ekkert var gert með okkar innlegg í málin, nema ef þannig hentaði fulltrúum Á - lista.

Fór svo að meirihluti Á – lista sprakk í lok júlí sl. sumar í þrjá hluta. Hafði víst gengið á ýmsu í herbúðum þeirra allt frá hausti 2008. Eftir rúmlega tveggja mánaða tímabil óvissu í bæjarstjórninni var nýr meirihluti myndaður sbr. samkomulag 27. september sl. Áður höfðu verið gerðar margháttaðar tilraunir til sátta og samstöðu allra í bæjarstjórn.

Þá hófst af eðlilegum ástæðum tímabil mikillar vinnu, þar sem mikil eindrægni ríkti við afar erfiðar aðstæður. Smátt og smátt skapaðist traust milli okkar í nýjum meirihluta og alger trúnaður ríkti hjá okkur í þeim þrönga hóp, sem mæddi mest á í þeirri hreingerningu, sem nauðsynlega fór fram.

Ásamt því að samhliða þessari vinnu allri var samin skýrsla með aðstoð fagmanna frá KPMG. Skýrsla sem var samþykkt sem skýrsla bæjarstjórnar 26. janúar sl. á fundi bæjarstjórnar. Jafnframt var á þeim fundi samþykkt fyrri umræða um fjárhagsáætlun 2010 og þriggja ára áætlun.

Skýrsla þessi er svar bæjarstjórnar við rannsóknarskýrslu eftirlitsnefndar með fjármálum sveitarfélaga dags. 7. desember sl. og afrakstur samnings við eftirlitsnefndina dags. 17. desember sl. Skýrslan er aðgengileg á heimasíðunni alftanes.is

Í dag hafa enn ekki borist svör við skýrslu bæjarstjórnar frá eftirlitsnefndinni og því hefur ekki verið hægt að boða fund bæjarstjórnar með dagskrá seinni umræðu um fjárhagsáætlun og þriggja ára áætlun.

Fjórir kostir virðast vera fyrir hendi:

Að við fáum að vinna áfram að lausn okkar mála, sbr. skýrslu bæjarstjórnar, í nánu samráði við eftirlitsnefndina eða fulltrúa hennar.

Að farið verði fram á heimild til greiðslustöðvunar og nauðasamninga.

Að eftirlitsnefndin mæli með því að sett verði fjárhaldsstjórn á Álftanesi.

Að sett verði lög varðandi aðkomu ríkisins að fjármálunum og þar með um sameiningu Álftaness við annað eða önnur bæjarfélög.

Engin leið er nú að meta hvað verður ofan á í tillögum eftirlitsnefndarinnar til ráðherra, en það hlýtur að vera æskilegast að við fáum að vinna skv. fyrsta kostinum, að sjá um framhaldið á eigin forsendum, þó svo virðist sem sá kostur sé hæpinn, þar sem staða bæjarsjóðs er svo yfirgengileg sem raun ber vitni.
Tvennt er það sem er mun vekja eftirtekt varandi vinnu út frá samkomulagi við eftirlitsnefndina frá 17. desember sl.

Annars vegna hvaða afstaða verður tekin til meininga um ójafnar greiðslur úr Jöfnunarsjóði vegna aldursdreifingar barna í Álftanesskóla. Við höfum ekki fundið það út í gegn um tíðina að þetta væri megin vandamál. En fulltrúar Á – lista hafa viljað gera út á þetta atriði síðan snemma síðastliðins sumars. Jafnvel hafa þau gengið svo langt að segja að fulltrúar D – lista hafi sýnt af sér fádæma aulaskap, með því að sækja ekki á þetta atriði hjá Jöfnunarsjóði og talið að inneign vegna þessa allt frá árinu 2002 sé nálægt 800 milljónum!! Í tillögum vegna fjárhagsáætlunar, sem fulltrúar Á – lista hafa lagt fram, er gert ráð fyrir að framlagið frá Jöfnunarsjóði hækki um 200 milljónir á ári!! Afstaða til þessa er nú til rannsóknar á vegum ráðuneytisins.

Hins vegar er það atriði í samkomulaginu við eftirlitsnefndina að rannsókn fer fram á öllum samþykktum fjárskuldbindingum bæjarstjórnar allt frá 1. janúar 2005. Þetta tel ég vera mjög mikilvægt atriði og þá kemur vonandi í ljós samhengi hlutanna. Rannsókn þessi er á vegum Ríkisendurskoðunar og er gert ráð fyrir skýrslu um málið í þessum mánuði.

Það er þyngra en tárum tekur að þurfa að taka á slíkum málum, sem okkar fjármál eru orðin. Vinnan undanfarna mánuði hefur verið mjög yfirgripsmikil og unnin af miklum heilindum og fagmennsku. Þá er ég þó ekki að vísa til minnihluta bæjarstjórnar. Gerðar hafa verið margháttaðar tilraunir til þess að ná samstöðu í bæjarstjórn um aðkomu að þessari nauðsynlegu vinnu, en því hefur minni hluti hafnað. Ekki eru þó fulltrúar Á – lista samstíga hvað þetta atriði varðar.

Það er erfitt að þurfa að kyngja því að hér hefur málum verið klúðrað með svo afgerandi hætti, sem raun er, á einungis rúmum þremur árum.

En þrátt fyrir allt er ég sannfærður og bjartsýnn á að við náum dampi á ný. Að við náum að sýna fram á að þær aðgerðir, sem kynntar eru í skýrslu bæjarstjórnar geti leyst svo málin, að færi gefist til farsælla lausna fyrir samfélagið á Álftanesi.
Leiðarljósið á að vera heildarhagsmunir Álftnesinga.

Við þurfum að tryggja að einungis þetta ár fari í að undirbúa og ganga frá sameiningu við annað bæjarfélag, því að þá eigjum við von um að auknar álögur á íbúa vari einungis út árið 2010.

Grundvöllur sameiningar Álftaness við annað bæjarfélag við þessar aðstæður er að ríkissjóður komi að málum með nokkuð myndarlegum hætti. Ekki er um það að ræða að við sjáum flöt á sjálfstæðu bæjarfélagi mikið lengur, því er nú ver.

Í aðdraganda vinnu, sem fram undan er vil ég tryggja:

„Sátt um að verja sjálfstætt samfélag á Álftanesi við erfiðar aðstæður.“

Ég tel mig hafa þá reynslu vegna starfa minna fyrir Álftnesinga, sem þarf í þá miklu vinnu sem framundan er. Ég hef staðið vaktina með mínum félögum, alls ekki vikist undan í því langhlaupi, sem staðið hefur frá í lok maí 2006.

Ég sækist eftir þeirri ábyrgð að skipa fyrsta sæti lista Sjálfstæðisfélagsins við sveitarstjórnarkosningarnar í vor og óska þess vegna eftir stuðningi í prófkjörinu á laugardaginn í það sæti.

Guðmundur

Góðærið á Álftanesi 2009.

Það brá mörgum Álftnesingi í brún og þótti sérkennilegt þegar framkvæmdir hófust á miðsvæðinu sl. sumar. Er þetta veruleikinn, var spurt? Eru aðstæður hér svona góðar?
Árið 2008 var Álftanes rekið með 832 milljóna kr. halla og munaði þar mestu um áhrif gengis- og vaxtasveiflna, sem ekki var tekið með í reikninginn í fjárhagsáætlun ársins. Hrun fjármálakerfis Íslands var afleiðing skipulagðrar glæpastarfsemi bankaeigenda og nokkurra stórra fyrirtækja, sem eftirlitsstofnanir og alþingi stóðust ekki snúning.

Þegar ársreikningar bæjarsjóðs Álftaness 2006 til 2008 eru skoðaðir í samhengi með fjárhagsáætlunum áranna sést að ekkert samhengi var með fjárhagsáætlunum og rekstri bæjarfélagsins. Einhvern vegin var þetta litla battarí okkar rekið á skjön við allan veruleika í trausti þess að hér kæmu inn tekjur í meira mæli en eðlilegt gat talist. Þá var helst talað um auknar tekjur vegna fasteignagjalda bygginga verslana, menningarhúss og hótels.

Sé ársreikningur 2007 skoðaður gaumgæfilega, þá er ljóst að þá þegar var bæjarsjóður fjárvana og í raun og veru þegar gjaldþrota. Þá hefði verið eðlilegt að ætla að fjárhagsáætlun fyrir árið 2008 hefði verið varkár, nei svo var nú ekki, því miður. Því eyðslan var í áður óþekktum skala það árið og kom það eins og þruma úr heiðskýru lofti á skrifstofurnar á Bjarnastöðum í byrjun október 2008 að algert kerfishrun hefði orðið í landinu.

Þá varð ljóst að ekki var við neitt ráðið, hvað rekstur bæjarsjóðs varðaði. Bæjarstjórinn þáverandi dreif í að setja saman drög að samþykkt bæjarstjórnar, sem átti að vera „leiðarljós“ í framhaldinu. Skyndifundir voru haldnir og samþykkt samhljóða af bæjarfulltrúum að ganga þann veg sbr. samþykkt bæjarráðs 9. október 2008.

Þá hefði maður getið sér þess til við þessar aðstæður sem sköpuðust við hrunið að mannskapurinn myndi einhenda sér í „neyðar“ samvinnu í bæjarstjórninni. Nei það var nú öðru nær, blekið var vart þornað á „leiðarljósinu“ þegar ljóst var að öll samvinna og samstarf um fjármálin voru bara á einni hendi, þrátt fyrir yfirlýsingar um annað á fjölmörgum fundum með ýmsum.

Ég fyrir mína parta tók „leiðarljósið“ þó mjög alvarlega og hóf að undirbúa tillögur að lækkun rekstrarkostnaðar bæjarsjóðs í samvinnu við mína félaga í bæjarstjórninni. Tillögur okkar voru unnar af heilindum. Tillögurnar innihéldu margháttaðar aðgerðir til lækkunar rekstrarkostnaðar bæjarsjóðs og voru lagðar fram á fundi bæjarráðs 17. desember 2008. Í stuttu máli var einfaldlega ekkert gert með þessar tillögur, vegna þess að sögn þáverandi bæjarstjóra „þá voru hér engin óyfirstíganleg vandamál.“

Ég lagði mikið upp úr því að til þess að þessar tillögur yrðu trúverðugar og aðgerðir í kjölfarið, þá yrði að lækka þóknun bæjarfulltrúa verulega. Þessu tóku bæjarfulltrúar Á – lista þunglega, en þegar ég lagði til á fundi bæjarstjórnar að lækka þóknun um 25%, þá sáu þau sig knúin til þess að samþykkja þá tillögu með fulltrúum D – lista. Síðan var bara ekkert annað gert, alls ekkert!

Fjárhagsáætlun 2009 tók alls ekkert á þessum erfiðleikum, sem blöstu við og það sem verra var, það var ekkert farið eftir fjárhagsáætluninni við rekstur bæjarfélagsins.
Athyglisvert er að í rannsóknarskýrslu á fjárreiðum og rekstri Álftaness, sem unnin var fyrir eftirlitsnefnd með fjármálum sveitarfélaga, dags. 7. desember 2009, gætir undrunar á því að ekkert var unnið eftir fjárhagsáætlun ársins 2009. Reyndar kemur sú staðreynd mér ekkert á óvart, það er sammerkt með árunum 2006, 2007 og 2008.

Þessi ábending í rannsóknarskýrslunni segir meira en mörg orð um það sem blasir við Álftnesingum:

„Þrátt fyrir 832 m.kr. halla á rekstri sveitarfélagsins árið 2008 hefur sveitarfélagið ekki gripið til viðhlítandi rekstrarhagræðingaraðgerða til að koma rekstrinum í jafnvægi.“

Staðreyndin er því miður sú að bæjarsjóður var rekinn frá degi til dags meginhluta ársins 2009, svona líkt og skussi myndi reka lítið bílaverkstæði. Í lok mánaðar gæti maður haldið að bæjarstjórinn þáverandi hefði bara stokkið af stað „til þess að redda laununum.“ Það var stólað á að alltaf væri hægt að grípa til þess ráðs að fá hækkun á yfirdráttarheimild í bankanum eða taka lán í bankanum á grundvelli framkvæmda (sem var gert) og nota síðan lánið til rekstrar bæjarsjóðs, svo sem greiðslu launa.

Ofan í allt þetta bjó fyrrverandi bæjarstjóri til atburðarrás í byrjun sumars, sem var vissulega algerlega úr takti við veruleikann sem við blasti. Hér skyldi útbúið Góðæri, sem hvergi var samlíking við á landinu öllu. Gerðir voru samningar í skyndi við Búmenn og verktakafyrirtækið Ris. Skyldu þessir aðilar reisa hér mikil mannvirki á miðsvæðinu. Var grundvöllur samninganna sá, til að fá þessa aðila að verki, að útbúnir voru leigusamningar í stórum stíl þar sem bæjarsjóður var skuldbundinn fyrir leigu hluta mannvirkjanna fyrir langt í 1,5 milljarða til allt að 50 ára.

Þá byrjaði fjörið og hófust framkvæmdir af miklum krafti, þegar tekið hafði verið enn eitt lánið og nú til að fjármagna gatnagerð á miðsvæðinu vegna fyrirhugaðra framkvæmda Búmanna og Ris. Vesenið varð því miður að ekki fengu verktakarnir nema hluta framkvæmdalánsins, því það þurfti auðvitað að greiða starfsfólki Álftaness laun með hluta þess. Síðan þurfti Jöfnunarsjóður íslenskra sveitarfélaga að hlaupa í skarðið með enn eitt lánið, til þess að m.a. væri hægt að greiða verktökunum.

Í öllum æsingnum var ákveðið að reisa byggingarkrana við grunn framkvæmda Búmanna á miðsvæðinu. Hann hefur nú verið tekinn niður.

Mikilvægt er að Búmenn og Ris verði ekki fyrir fjárhagslegum skaða vegna þessa ævintýris. Nauðsynlegt er og mjög raunhæft að þessir aðilar fái með sér í verkefnið rekstraraðila með raunhæfar áætlanir um uppbyggingu á svæðinu.

„Góðærið“ sem var búið til í sumar, voru falsvonir einar og örvænting.

Nú ríður á að Álftnesingar nái að vinna sig hratt út úr fjárhagsvandanum, en það verður vissulega því miður ekki gert nema með greiðslum úr ríkissjóði.

Tryggja þarf að sérstakt álag á útsvar og fasteignagjöld vari ekki lengur en árið 2010.

Álftnesingar þurfa að sameinast um að:
„Verja sjálfstætt samfélag á Álftanesi við erfiðar aðstæður.“

Guðmundur

Nýju fötin keisarans.

Á stuttum fundi bæjarráðs í dag hafði fulltrúi Á - lista ekki áhuga á að ræða dagskrárliðina, sem vörðuðu fjárhagsáætlun, að neinu marki. Aðalmálið var að skubba fundinum af, svo hægt væri að senda mbl.is tilkynningu um að fulltrúi Á - lista hefði lagt fram tvær tillögur á fundinum. Nerkilegt nokk.

Tillögur þessar eru með nokkrum ólíkindum, einkum í ljósi þess að á fundi bæjarstjórnar sl. fimmtudag var kynnt skýrsla bæjarstjórnar til eftirlitsnefndarinnar. Skýrslan verður á dagskrá fundar bæjarstjórna á morgun og fær þá formlega afgreiðslu.

Fyrri tillaga fulltrúa Á - lista á fundi bæjarráðs í dag er um "að gera ríkissjóði tilboð í að kaupa hlutafé Álftaness í Fasteign á fjórföldu nafnverði." Hin tillagan er um að "gera ríkissjóði tilboð um kaup á lóð fyrir menningar- og náttúrufræðisetur." Með tekjum af þessum "tilboðum" á víst að bæta eiginfjárstöðu bæjarsjóðs.

Já þetta eru réttar tilvitnanir.

Á - listinn hefur snúist 180° - muna ekki margir að fyrrverandi bæjarstjóri, sem bar upp þessar tillögur í bæjarráði fyrr í dag sagði þegar ljóst lá fyrir að leita þyrfti til eftirlitsnefndar með fjármálum sveitarfélaga, að um uppgjöf væri að ræða. Að hér væru engin vandamál og að allur þessi málatilbúnaður væri gerður að tilhutan fulltrúa D - lista, sem "ætluðu að sameina Álftanes Garðabæ." En þá var ljóst að bæjarsjóður var fjárvana með skuldabagga upp á yfir 5 faldar árstekjur. Þetta eru nú ekki trúverðugar tillögur af vörum fulltrúa Á - lista, þegar ljóst er að sá sem bar upp tillögurnar í bæjarráði í dag, er sá sem mesta ábyrgð ber á gjaldþroti bæjarsjóðs. Þessi fyrrum bæjarstjóri kýs að afhjúpa sig með þessum einkennilega hætti.

Einhverjum gæti dottið í hug "nýju fötin keisarans."

En sjón er sögu ríkari, þessar kostulegu tillögur eru í fundargerð bæjarráðs frá í dag á heimasíðunni alftanes.is

Guðmundur

Fjárhagsáætlun 2010

Einkennilegur fréttaflutningur, einkum á ruv.is og mbl.is, var af lokuðum vinnufundi bæjarstjórnar á fiummtudaginn var og látið í það skína að fjárhagsáætlun ársins væri lögð fram til fyrstu umræðu á lokuðum fundi. Svo var auðvitað alls ekki.

Fundur bæjarstjórnar á fimmtudaginn var til þess að ræða skýrslu bæjarstjórnar til eftirlitsnefndar með fjármálum sveitarfélaga, fjárhagsáætlun 2010 og þriggja ára áætlun 20011 til 2013. En eftir að eftirlitsnefndin skilaði rannsóknarskýrslu sinni um fjármál bæjarfélagsins í desember, var gerður samningur við nefndina um tiltekna vinnu. Vinna þessi er í formi skýrslu bæjarstjórnar, sem upphaflega var samið um að lægi fyrir 20. janúar, en frestur fékkst til 27. janúar vegna umfangs málsins.

Skemmst er frá að segja að fundur bæjarstjórnar á fimmtudaginn var fór út um þúfur vegna upphlaups fyrrverandi bæjarstjóra og sleit forseti fundinum mun fyrr en ætlað hafði verið og án þess að nein efnisleg umræða af viti færi fram um boðað fundarefni.

Í dag er fundur bæjarráðs, þar sem skýrsla bæjarstjórnar ásamt fjárhagsáætlun ársins og þriggja ára áætlun er á dagskrá.

Á morgun verður fundur bæjarstjórnar, þar sem skýrslan verður til umfjöllunar og fyrri umræða um fjárhagsáætlun ársins og þriggja ára áætlun lögð fram.

Síðan er áætlað er halda fund bæjarstjórnar 4. febrúar nk. og þá fari fram síðari umræða um fjárhagsáætlun ársins.

Reyndar fer tímasetning seinni umræðu um fjárhagsáætlun eftir þeim viðbrögðum, sem skýrsla bæjarstjórnar um fjármál bæjarsjóðs fær hjá eftirlitsnefninni. Hvort bæjarstjórn fær svigrúm til þess að vinna áfram að erfiðum málum okkar Álftnesinga á grundvelli skýrslunnar án íhlutunar ráðuneytisins.

Mér þótti rétt að árétta þessi atriði, vegna þess að því hefur verið haldið fram að fyrri umræða um fjáhagsáæltun hafi farið fram "fyrir luktum" dyrum, sem er auðvitað fjarri sanni, sbr. ofangreint.

Guðmundur

Í aðdraganda þorrablótsins

Þorrablótið verður haldið laugardaginn 23. janúar nk. Að undirbúningi þess vinna orkuboltar frá Kvenfélaginu og Lionsklúbbnum. Ég veit að enn er hægt að nálgast miða á blótið.

Í Morgunblaðinu í dag er skondin tilkynning frá ,,Bæjarmálaráði Á - listans" um að þegar skuli hafinn undirbúningur að framboði Á - listans vegna sveitarstjórnakosninga í vor. Þar eru þrír einstaklingar nefndir á nafn og athygli vekur að fyrrverandi forseti bæjarstjórnar er ekki nefndur til sögunnar, enda fær hann bara að vera með, þegar hentar hverju sinni. Einnig er það athyglisvert að þessi hópur, sem telur 5 til 6 manns skuli láta sér detta í hug slíka vitleysu sem þessa. Þvílík firring. Þeir sem nefndir eru til sögunnar í tilkynningunni bera þyngsta ábyrgð bæjarfulltrúa á Álftanesi á allra mesta skandal í sögu sveitarfélaga á Íslandi og meðferð á almannafé, gjaldþroti heils bæjarfélags.

Já segja má að firringin sé alger og einkum hjá fyrrverandi bæjarstjóra, sem er jú hugmyndafræðingurinn í hrunadansi Á - listans, með augljósum erfiðum afleiðingum fyrir Álftnesinga. Að hugsa sér slíka framkvæmdastjórn á einungis um þremur árum. Raunar komu fyrstu einkenni hruns Álftaness fram strax sumarið 2006, þegar teknar voru magnaðar innistæðulausar ákvarðanir í bæjarstjórn og tengdar við kosningaloforð Á - listans! Þá var Gleðibanki Á - listans opnaður, að hætti útrásavíkinganna, sem stálu íslensku bönkunum.

Ég nefndi þorrablótið í upphafi og tel víst að með einum eða öðrum hætti sé þessi tilkynning gerð með aðdraganda þorrablótsins í huga, enda er það þekkt í gegn um árin að sveitarstjórnin hverju sinni fær tiltekinn skammt af pillum í skemmtiatriðum.

Ætla má að þessi tilkynning sé sett í Moggann til þess að magna spennuna fyrir blótið, svo mikið grín sem þessi einstaka tilkynning ber augljóslega með sér.

Athygli vekur að ekki fer mikið fyrir umfjöllun í fjölmiðlum af þátttöku í undirbúningi framboðs Sjálfstæðisfélagsins vegna sveitarstjórnarkosninganna, þar eiga þó nokkru fleiri hlut að máli en hjá Á - lista, sem rúin er trausti. Frestur til að skila framboðum í ætlað prófkjör Sjálfstæðisfélagsins rann út um síðastliðna helgi. Þar komu 12 nöfn upp úr hattinum og stefnir í spennandi prófkjör við afar erfiðar aðstæður á Álftanesi og næsta víst að ekki er kosið til heils kjörtímabils að þessu sinni.

Guðmundur

Framboð Sjálfstæðisfélagsins í sveitarstjórnarkosningum.

Auglýsingu var dreift fyrir jól á Álftanesi með Grásteini blaði Sjálfstæðisfélagsins, þar sem auglýstur var undirbúningur að framboði Sjálfstæðisfélagsins og óskað eftir þátttöku í prófkjöri vegna þess.

Ég hef nú komið til skila til kjörnefndar vegna framboðs Sjálfstæðisfélagsins eftirfarandi erindi:

,,Undirritaður Guðmundur G. Gunnarsson kt. 010850-3399 Norðurtúni 3, gef kost á mér til framboðs fyrir Sjálfstæðisfélag Álftaness í sveitarstjórnarkosningum 29. maí 2010.
Samkvæmt samþykkt aðalfundar Sjálfstæðisfélags Álftaness, að tillögu stjórnar félagsins, var ákveðið að fram færi prófkjör til röðunar á lista félagsins 30. janúar nk.

Ég er oddviti lista félagsins og býð mig fram í fyrsta sæti á framboðslista Sjálfstæðisfélagsins í næstu sveitarstjórnarkosningum við afar erfiðar aðstæður á Álftanesi og tel að kraftar mínir og reynsla geti nýst Álftnesingum til hagsbóta í þeirri umfangsmiklu vinnu sem óhjákvæmilega er framundan.
Álftanesi 9. janúar 2010.
sign:
Guðmundur G. Gunnarsson

25 félagar í Sjálfstæðisfélagi Álftaness standa að framboðinu."

Tveir umdeildir búa á Álftanesi

Nú hefur forseti Íslands sett þjóðfélagið á annan endann, með tilkynningu sinni um að skrifa ekki undir lög frá alþingi um Icesafe.

Hvernig stendur á því að forsætisráðherra hlerar ekki forsetann í atganginum á alþingi undanfarna mánuði vegna þessa máls, um hvað hann muni gera, þegar sama málið kemur öðru sinni á hans borð? Í ljósi þess hvernig hann afgreiddi fyrri lögin um Icesafe.

Hvernig stendur á því að forseti tilkynnir ekki forsætisráðherra fyrirfram í trúnaði um sína ákvörðun, til þess að færi hefði gefist til að undirbúa yfirveguð viðbrögð til þjóðarinnar og innlendra og erlendra fréttastofa, þannig að allavega lægi fyrir sjónarmið ríkisstjórnarinnar? Forseti hefði mátt geta sér til um að ákvörðun hans um að synja lögunum staðfestingar myndi valda nokkrum usla.

Alþingi afgreiddi Icesafe lög öðru sinni 30. desember sl.

Forseti hefur marglýst yfir því að til þess gæti komið að hann beitti þessu umdeilda ákvæði í stjórnarskránni. Voru skilaboðin ekki nógu skýr frá honum, til þess að alþingi væri ljóst að bregðast þyrfti við og skýra lög hvað þetta umdeilda atriði varðaði? Það hafa liðið um 66 ár og að því er virðist ekki verið ástæða til að breyta lögunum, hvað þetta atriði varðar.

Hvernig má það gerast að forseti gefi sér á líkum að meirihluti sé á alþingi fyrir þjóðaratkvæðagreiðslu um Icesafe málið? Alþingi hafnaði fyrir nokkrum dögum að slík atkvæðagreiðsla færi fram. Einnig gefur forseti sér vafasamar forsendur varðandi nafnalista Indefence hópsins. En komið er í ljós að einhverjir í þeim hópi, sem skráðu sig eða voru skráðir á þann lista, héldu að með því væri verið að mæla með því að samningi um greiðslur vegna Icesafe yrði hafnað. En svo var vissulega ekki uppi á teningnum, hvað varðaði forsendur þessa umdeilda lista.

Á Álftanesi búa nú um stundir tveir umdeildir menn.

Hinn er sá sem setti bæjarsjóðinn okkar á hliðina, á innan við þremur árum. Þar er ég að tala um frekar illa meðferð á almanna fé.

Atburðarrásin frá í júní 2006 hefur verið lyginni líkust á Álftanesi. Sá sem ber mesta ábyrgð á hruni bæjarsjóðs Álftaness, sýndi af sér dæmalausan dómgreindarskort.

Þeir sem honum fylgdu áttuðu sig því miður of seint, skaðinn var skeður.

Nú er unnið að því hörðum höndum að lágmarka skaðann, með heildarhagsmuni íbúa að leiðarljósi. Ég er bjartsýnn á að Álftnesingar sjái fram á betri tíð.

Það merkilega er hve mikil líkindi eru með óhófi og hruni íslenska kerfisins undanfarinn áratug undir skilningarvitum fulltrúa þjóðarinnar á alþingi annars vegar og svo hins vegar óhófi og hruni fjárhags Álftaness.

Á Álftanesi glímum við við eigið Icesafe. Spurning í okkar tilfelli er, hver á að borga óreiðuna?

Hér er tilvitnun í bókun bæjarfulltrúa Sjálfstæðisfélagsins á fundi bæjarstjórnar Álftaness 28. ágúst 2006:

,,Reyndar er það svo að margar gjörðir Á lista frá kjördegi í maí sl. virðast miða að því að leggja fjárhag bæjarfélagsins í rúst á sem skemmstum tíma, svo hart er keyrt. Fulltrúar D lista frábiðja sér slík vinnubrögð sem þessi og lýsa fullri ábyrgð á hendur fulltrúum Á lista.“

Guðmundur